Маңғыстауда Тұңғыш Президент күніне арналған мерекелік шара өтті

​1 желтоқсанда ҚР Тұңғыш Президенті күніне орай М. Өскінбаев атындағы Маңғыстау облыстық филармония ұжымдарының «Тұғыры биік- Тәуелсіздік» атты мерекелік концерті өтті, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Ән кешінде Абыл Тарақұлы атындағы қазақ оркестрі, «Ақжарма» фольклорлық ансамблі, кіші симфониялық оркестрі, Камералық, «Ақшағыл» этно-фольклорлық ансамблдері өнер көрсетіп, халықтың ыстық ықыласына бөленді.

Жиналғандарды 1 желтоқсан - Қазақстанның Тұңғыш Президенті күнімен құттықтаған облыс әкімі Нұрлан Ноғаев мерекенің мән-маңызына тоқталды.

- Нұрсұлтан Назарбаев – саңлақ саясаткер, кемеңгер көшбасшы. Тәуелсіздік туы желбіреген 30 жылда қол жеткізген зор жетістіктеріміздің бастауында Елбасы тұр деп мақтанышпен айта аламыз. Еліміз Тәуелсіздік алған жылдары өте қиын болды. Елбасы Нұрсұлтан Назарбаев жауға жалғыз шапқан батыр сияқты бар жауапкершілікті өзіне алып, елдің жарқын болашағы үшін батыл шешімдер қабылдады. Міне, бүгін сол қажырлы еңбектің арқасында Қазақстан әлемдік қауымдастықта лайықты орнын алды. Ең бастысы, Қазақстанның Тұңғыш Президенті ел тарихында алғаш рет заң жүзінде рәсімделген және әлем мойындаған 13 400 шақырымдық мемлекеттік шекараны бекітті. Осылайша бірлігі мен ынтымағы жарасқан ел болып, Тәуелсіздігіміздің 30 жылдығын атап өтіп отырмыз,-деді Нұрлан Ноғаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.