Мұрат Өскінбаев атындағы Маңғыстау облыстық филармониясында қобызшылар тобының концерті өтті, деп хабарлайды mangystaumedia.kz.
Республика бойынша саусақпен санарлық қана қобызшылар тобы бар. Соның бірі бүгін Маңғыстау облысында құрылып отыр. Топтың мақсаты — қазақтың, қала берді әлем өнерпаздарының мұрасын насихаттап, болашақ ұрпаққа жеткізу.
Ансамбль құрамында 4 қобызшы бар. Атап айтқанда Құрманғазы атындағы қазақ ұлттық консерваториясының түлегі, халықаралық конкурстардың лауреаты Гүлжан Қарабалаева, "Шабыт" қазақ ұлттық университетінің түлегі, халықаралық конкурстардың лауреаты Ұлмекен Шодырова, Түркістан облысындағы Сырдария университетінің түлегі, халықаралық конкурстардың лауреаты Ақмарал Мотыева және топтың жетекшісі, Құрманғазы атындағы қазақ ұлттық консерваториясының түлегі, халықаралық конкурстардың лауреаты Мөлдір Меңділдә бар.
— Былтыр жастар жылы аясында филармонияда "Ақшағыл" ұлттық аспаптар ансамблі құрылды. Биыл соның жалғасы ретінде қобызшылар тобын ашып отырмыз. Топтың репертуарында ұлттық, әлемдік деңгейдегі классикалық музыкалар бар. Бұл концертке бір жыл дайындалдық. Ұлттық аспабымызды, әуенімізді дүние жүзіне танытатын топ болады деп ойлаймын, — дейді филармония басшысы Бекбол Базарбаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
