Маңғыстау өнерінің мерейтой иелері

Маргарита ОМАРОВА. Абай атындағы мәдени­-демалыс кешені директорының шығармашылық ұйымдастыру жөніндегі орынбасары Маргарита Омарова 1987– 1989 жылдары Астрахань қалалық тамақтану өнеркәсіптік-­технологиялық техникумын аяқтап, еңбек жолын техник­-технолог қызметінен бастаған. Маргарита Әміржанқызы 2004 жылы облыстық филармонияда вокал студиясында әдіскер және актерлік шеберлік сабағынан дәріс берді.

Маргарита Әміржанқызының режиссерлығымен 2009 жылы «Үрей мен үміт» театралдық қойылымы, 2016 жылы «Жаңа жоба, жаңа есім» телеарналық шығармашылық жобасы, 2019 жылы «Шабыттан! Жаса! Жарқыра!» телеарналық шығармашылық мега жобасы, 2020 жылы «Дауыс 40+» телеарналық шығармашылық мега жобасы эфирге шықты.

«Мұнайлы ауданына 10 жыл», Абай атындағы МДК 45 жылдық мерейтойына орай алғыс, «Ақтау қаласының 55 жылдығы» төсбелгісінің иегері Маргарита Омарова – шаңырағында 5 бала, 6 немере өсіріп, тәрбиелеп отырған берекелі отбасындағы аяулы ана, асыл жар, бақытты әже.

Эльмира САЛИХОВА

Маңғыстау облыстық қуыршақ театрының әдебиет бөлімінің меңгерушісі Эльмира Салихова 1990–1993 жылдары Атырау қаласы мәдениет училищесінің көпшілік жұмысы режиссері бөлімін бітірген. 2003 жылдан бастап Маңғыстау облыстық қуыршақ театрында режиссердің көмекшісі қызметін атқарып келеді.

2011–2015 жылдары Қырғызстанның Бішкек қаласындағы Бейшеналиева атындағы «Өнер және Мәдениет» университетінің драма режиссері бөлімін бітірген Эльмира Шадатқызы 2016 жылы театрдың 35 жылдығына орай, театр қайраткерлері одағының атынан алғыс хатпен марапатталған.

2019 жылы «Еңбекті қорғау қауіпсіздігі» бағдарламасы бойынша дәріс алды. Қоғамдық жұмыстарға белсене атсалысады. Ұжымдастар арасында сыйлы.

Майра БАҚБЕРДИЕВА

Екі мәрте «Ең үздік әйел бейнесі» номинациясының иегері атанған театр іргетасын қалаушылардың бірі Майра Бақбердиева 1981 жылы 1 мамырда Қызылорда облысында дүниеге келген.

2003 жылы Т.Жүргенов атындағы Қазақ ұлттық өнер академиясының музыкалық драма театр әртісі мамандығы бойынша бітіріп шыққан Майра – сол жылдан бері Маңғыстау облыстық Н.Жантөрин атындағы музыкалық драма театрының шебер әрі жетекші маманы.

Альт дауысты Майра – қазақ аналарының образын шебер сомдайтын, өз ісіне жауапты, берілген рөлдерін межесіне жеткізе орындайтын шебер актриса. Әйел психологиясының нәзік тұстарын көрерменге жеткізе білетін шеберлігімен ерекшеленетін Майраның дауысы ырғақты, сахналық тілі тұнық. Қала, облыс, республика көлеміндегі көптеген қоғамдық шараларды ұйымдастыруға белсене атсалысады.

Майра Сәрсенқабылқызы Қазақстан театрларының XVI республикалық фестивалінің «Ең үздік әйел бейнесі» номинациясының иегері атанып, ҚР мәдениет саласының үздігі төсбелгісімен марапатталды.

Сахнада У.Шекспирдің «Ромео мен Джульетта» пьесасында Джульеттаның сүт шешесінің, Ш.Айтматовтың «Ана – Жер Ана» туындысында Толғанайдың, Н.Гогольдің «Ревизор» қойылымында Анна Андреевнаның, С.Ахмадтың «Келіндер көтерілісі» пьесасында Фармон бибінің т.б үлкенді­-кішілі рөлдерді сомдап шыққан Майра Сәрсенқабылқызы – көрермендерге жақсы танымал өнер иесі.

Ғалия ТІЛЕГЕН

Моңғолия Республикасының Улан-­Батыр қаласында дүниеге келген Ғалия Тілеген 1999 жылы Т.Жүргенов атындағы Қазақ ұлттық өнер академиясына түсіп, 2003 жылы кино және театр әртісі мамандығын алып шықты. Ғалия – 2003 жылдан бері Н.Жантөрин атындағы Маңғыстау облыстық музыкалық драма театрының шебер әртісі.

Ғалия – өзінің жұмысына тиянақты, жауапкершілігі мол, өзіне берілген рөлдерді сомдау кезінде табандылық пен тапқырлық таныта білетін жан. Оның шығармашылық деңгейі күннен-­күнге өсуде. Сонымен қатар театрдың қоғамдық жұмыстарына да белсене атсалысады. Көптеген негізгі рөлдерді сомдаумен қатар шынайы, терең межесіне жеткізе білетін амплуасы кең, комедиялық нотасы жоғары бірегей, адал, шыншыл, актриса.

Ғалия өнердегі еңбегі үшін мәдениет басқармасының «Актерлік шеберлігі үшін» алғыс хатымен, Қазақстан театр қайраткерлері одағының Құрмет грамотасы т.б марапаттарға ие болды.

Ол – 20­дан аса рөлдерді сомдаған актриса және оның басым бөлігі басты рөлдер. С.Назарбек «Ақбөбек» – Дина, Т.Әліпбаев «Томирис» – Жолбарыс, С.Ахмад «Келіндер көтерілісі» – Сатты т.б.

Гүлсина МЕРҒАЛИЕВА

Маңғыстауда Нұрмұхан Жантөрин атындағы музыкалық драма театры ашылған күннен жас өнер ордасының іргетасын қалаушылардың бірі саналатын Гүлсина Мерғалиева Ресейдің Саратов облысында туған. Атажұртына қызмет етуді армандаған Гүлсина Алматыдағы Т.Жүргенов атындағы Қазақ ұлттық өнер академиясына оқуға түсіп, оны үздік бітірген соң еңбек жолын Көкшетау театрында бастаған өнерпаз Елбасы тапсырмасымен Ақтауда театр ашылған күннен бері театрдың бас режиссері және көркемдік жетекшісі қызметтерін қоса атқарып, жоғары кәсіби біліктілігінің арқасында көптеген шығармашылық жетістіктерге жетті.

Гүлсина Бақытжанқызы «Тарлан» сыйлығы, «Шабыт» VII халықаралық фестивалінде гран­-при, Қазақстан Республикасының еңбек сіңірген қайраткері құрметті атағына ие. Театрдың республикадағы алдыңғы қатарлы өнер ордасы қатарына қосылуына зор үлесін қосып жүрген өнерпаз осы жылдың қаңтар айында Н.Жантөрин атындағы музыкалық драма театрының директоры қызметіне тағайындалды.

Елена СИНИЦА

Абай атындағы мәдени­-демалыс кешені «Колибри» театр­-студиясының жетекшісі, мәдениет саласының үздігі Елена Анатолиқызы Синица – 1983 жылдан бері Абай атындағы мәдениет сарайында саяси-­көпшілік бөлім меңгерушісі, көркемдік бөлім жетекшісі, көркемдік басшы, бас директордың орынбасары, «Колибри» театр­студиясы үлгілі ұжымының жетекшісі қызметтерін атқарған мәдениет майталманы.

Биыл алпыстың асқарына шыққан Елена Анатолиқызы ұзақ жылдар бойғы жемісті еңбегі үшін 2000 жылы «Мәдениет қайраткері» атағымен, 2013 жылы «Маңғыстау облысына 40 жыл», «Ақтау қаласына 50 жыл» медалімен, 2016 жылы Маңғыстау облысы әкімінің Құрмет грамотасымен марапатталды.

2008 жылы «Littlemissworld», «Model&TalentWorld» балалар байқауының халықаралық қазылар алқасының құрамына еніп және 2012, 2015, 2017 жылдары «Үздік ұлттық директор», 2018 жылғы халықаралық байқаулардың «Қазақстандық ұлттық директор» лицензиясын және сертификатын қорғап, «Little miss world» Греция, «Model &Talent World» Түрік елі, «Little miss & mister planet» Болгария, «Littlemissnations» Бразилия елдерінің абырой-­атақтарын иеленді.

Нэйла АРЗЫМБЕТОВА

М.Өскінбаев атындағы Маңғыстау облыстық филармониясының аспапшы әртісі, камералық ансамбльдің көркемдік жетекшісі, кіші симфониялық оркестрдің концертмейстері Нэйла Арзымбетова 1989–1994 жылдары Құрманғазы атындағы Қазақ ұлттық консерваториясын скрипка мамандығы бойынша бітіріп шықты.

Еңбек жолын 1994 жылдан бастап мәдениет саласына арнаған Нэйла Асубекқызы 2009 жылы Маңғыстау облысы әкімінің арнайы шақыртуымен Мұрат Өскінбаев атындағы Маңғыстау облыстық филармониясында кіші симфониялық оркестр әртісі қызметін атқарып келеді.

2013 жылы Маңғыстау облысы әкімінің және Маңғыстау облысы әкімінің аппарат басқармасының алғыс хатымен, 2016 жылы М.Өскінбаев атындағы Маңғыстау облыстық филармониясының 40 жылдығына орай Маңғыстау облысы әкімінің алғыс хатымен марапатталды.

Үміт ЖӘЛЕКЕ