Жан жылуын сыйлаған

Көктемнің алғашқы мерекелерінің бірі аруларға арналады. Бұл күндері нәзік жандылардың жүзі қуанышқа, құшағы гүлге толады. Жақындарынан жүрек жарды тілек естіп, шаттанады. Осынау мерекеге себепші асыл жандардың бүгінгі қоғамда алар орны ерек. Соның ішінде жауапты мамандықтың иесі болу бір бөлек. Ана мен бала өміріне араша болып, дені сау ұрпақтың өмірге келуіне себепші болып, жаңа туылған сәбидің денсаулығын жіті бақылап, аналардың алғысын алу бір ғанибет болар.

Бүгінгі кейіпкеріміз – жас босанған ана мен өмірге келген періштенің денсаулығын жіті бақылап отыруды негізгі жұмысы етіп таңдаған жас маман Назымгүл Өтемісова. Мектеп кезінен армандаған оқуына түсіп, 7 жыл табандылықпен білім алған Назымгүл бүгінде облыстық Ана мен бала орталығында білікті педиатр маманы. Күніне бірнеше сәби өмірге келсе, олардың денсаулығы өз мойнында. Үлкен жауапкершілікті қажет ететін жұмысын жақсы көреді.

«Менің жұмысым шала туған балалармен тікелей байланысты. Сондықтан өмірге келген әрбір сәбиді кезінде жетілдіріп, дамытуға күш салып, қадағалаймыз. Туған аптасына байланысты перзентханада ұстап, үйлеріне аман-есен жөнелтеміз. Жаңа туылған нәрестелердің денсаулығы біз үшін маңызды. Ата-аналар да алғысын айтып жатады. Алған алғысымыздың арқасында жұмысымызды абыройлы атқарып келеміз. Гинеколог мамандармен де тығыз жұмыс жасаймыз. Олармен бірге күнделікті тексеріске шығып, аналардың баланы дұрыс емізуін де қадағалаймыз. Дұрыс емізу бойынша жас аналарға міндетті түрде арнайы сабақ өткіземіз. Жұмысым өзіме ұнайды. Жас босанған ана да, өмірге келген сәби де – періште. Сондықтан осындай мамандықты таңдағанымды мақтан тұтамын. Бізде неонатолог мамандары жетіспейді. Артымнан ерген інісіңлілеріме осы мамандықты таңдауға кеңес берер едім», – дейді жас маман.

Назымгүл қазіргі таңда білімін жетілдіру мақсатында Марат Оспанов атындағы Батыс Қазақстан медицина университетінде неонатолог мамандығының резидентурасын оқып жатыр. Мамандығын мақтанышы санайтын ол мереке күндері де ана мен баланың денсаулығы үшін үнемі жұмыста жүретінін айтады. Десе де, барлық нәзік жанды аруларға ыстық ықыласын жолдай отырып, ақ тілегін арнады.

Айгүл ОРЫНБАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.