Кәсіпкерлікке – кең өріс

Кеше облыс әкімдігінің мәжіліс залында аймақ басшысы С.Трұмовтың төрағалығымен, ҚР «Атамекен» ұлттық кәсіпкерлер палатасының басқарма төрағасы А.Мырзахметовтің облыс активімен кездесуі өтті. «Мемлекет басшысы Қасым-Жомарт Тоқаев Қазақстан халқына «Сындарлы қоғамдық диалог  – Қазақстанның тұрақтылығы мен өркендеуінің негізі» атты Жолдауында тиімді шағын және орта бизнес – қала мен ауылды дамытудың берік негізі. Шағын, әсіресе микробизнес еліміздің әлеуметтік-экономикалық және саяси өмірінде маңызды рөл атқаратынын атап өтті. Сондықтан бүгінде жеке кәсіпкерлікті қолдау және дамыту – еліміздің экономикалық дамуының негізгі қозғаушы күші болып табылады. Бүгінгі таңда Маңғыстау облысы бойынша кәсіпкерлікті дамытудың динамикалық көрсеткіштері оң нәтижеге ие. Өңірімізде өзіміздің «Нұр капитал» 1% шағын және орта бизнесті қаржылық қолдаудың өңірлік бағдарламасы іске асырылуда. Дүниежүзілік банктің рейтингісінің нәтижелеріне сәйкес Маңғыстау облысы бизнес жүргізудің қарапайымдылығы бойынша Алматы қаласынан кейін 2-орынды иеленді. Біздің кәсіпкерлер жаңа өнеркәсіптік және коммерциялық нысандарды құруды, қызмет көрсету саласын кеңейтуді қалайды. Осы жобаларды іске асыру үшін біз шағын және орта бизнес субъектілеріне қаржылық және консультациялық қолдау көрсету жөніндегі жұмысты жалғастырамыз. Соңғы жылдары «Атамекен» ұлттық кәсіпкерлер палатасы отандық бизнесті жандандыруға елеулі үлес қосқанын атап өтуге болады», – деді жиын барысында С.Трұмов. Облыс активімен кездесуде сөз алған Абылай Мырзахметов Маңғыстау өңірімен әрдайым қарым-қатынас барысында бизнеске одан әрі қолдау білдіретінін және қатысушыларға ризашылығын жеткізіп, аймақ басшысына алғысын білдірді.

Кенжебек СЕРЖАНҰЛЫ