Қайраткерді еске алды...
[ 2019 ] 8 қазан, 10:35 | Қоғам
Таяуда Түпқараған ауданы, Ақшұқыр елді мекеніндегі мешіт жанында «Парасат» саяси-қоғамдық ұйымының негізін қалаушы, көрнекті қоғам қайраткері, өлке мақтаныштарының бірегейі Сайын Нәдірұлы Шапағатовтың рухына садақа беріліп, ардагер тұлғаны халқы тағы бір мәрте еске алды.
Қазақ халқы тәуелсіздікке жанын пида етіп, арман-тілектерін, өз өмірін арнаған кешегі есіл ерлердің арқасында қол жеткізгені баршаға аян. Ұлт жадында өз есімін алтын әріппен қалдырған, жүрегінде хат болып жатталған аяулы азаматтардың бірі – Сайын Шапағатов еді.
Еске алуға жиналушылар алдымен Қошқар ата қорымындағы қайраткердің басына барып құран бағыштап, рухына зиярат етті.
Содан кейін мешіт жанына ас үстінде жиналғандар арасынан Ж.Шапағатов, Т.Айдарханов, С.Шәкірат, С.Адай, Қ.Демеубергенұлы, Д.Аралбайұлы, «Сайын Шапағатов қорының» директоры Қалимаш Баймағанбетова т.б. сайын даланың Сайын ұлының халқына еткен еңбегі, ұрпақ жадындағы өшпестей ерлігі турасында сөз сөйлеп, біртуар азаматтың тағы бір болмысын аша түсті. «Маңғыстау-Медиа» ЖШС директоры А.Дутбаева өзі басқаратын баспасөз құралдары арқылы Сайын Шапағатов еңбегі мен мұрасын ұрпаққа ұлағат ету үшін құрылған қор жұмысына әр кез ақпараттық қолдау жасайтынын атап өтті.
Кенжебек СЕРЖАНҰЛЫ
1603
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
