Ақтауда дәрігер-хирургқа қатысты әкімшілік іс тоқтатылды
[ 2019 ] 2 тамыз, 12:16 | Қоғам
Бүгін Маңғыстау облыстық сотының азаматтық істер жөніндегі сот алқасында облыстық балалар ауруханасының хирург дәрігері Н-ға қатысты әкімшілік іс қаралды. Сот дәрігерге қатысты әкімшілік істі тоқтату жөнінде шешім шығарды. Бұл туралы Маңғыстау облыстық соттың баспасөз қызметі мәлімдеді, - деп хабарлайды mangystaumedia.kz сайты.
Сот мәжілісінде шағым уәждер мен іс материалдарындағы дәлелдемелерге баға берілді. Жеті куә тыңдалды, бейнежазба материалы талқыланды.
«Апелляциялық сот алқасының қаулысымен Ақтау қаласының мамандандырылған әкімшілік сотының 2019 жылы 19 шілде күнгі Н-ға қатысты қаулысының күші жойылды. Оның әрекетінде әкiмшiлiк құқық бұзушылықтың болмауына байланысты іс тоқтатылды. Сот қаулысы заңды күшіне енді», - дейді Маңғыстау облыстық соттың баспасөз қызметі.
Еске сала кетейік, Ақтау қаласының мамандандырылған әкімшілік сотының 2019 жылы 19 шілдедегі қаулысымен облыстық балалар ауруханасының хирург дәрігері Н. Қазақстан Республикасы ӘҚБтК-нің 434-бабының 2-бөлігінде көзделген әкімшілік құқық бұзушылық жасағаны үшін кінәлі деп танылған еді. Оған 1 тәулік мерзімге әкімшілік қамаққа алу түріндегі әкімшілік жаза қолданған.
Сот алқасында Н. мен оның қорғаушысы бірінші саты сотының қаулысымен келіспей, шағым келтірген. Онда өзінің аталған құқық бұзушылықты жасамағандығын, кінәлі еместігін көрсетіп, істі тоқтатуды сұраған.
Жұлдызай ҚАЛИЕВА
Суреттерді Маңғыстау облыстық соттың баспасөз қызметі ұсынды
1197
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
