Ақтауға Ресейдің «Бриллиант» шекаралық кемесі келді (ВИДЕО)
[ 2019 ] 5 маусым, 11:27 | Қоғам
Бүгін Ақтау айлағына Ресейдің Федералдық қауіпсіздік қызметінің шекаралық «Бриллиант» кемесі келді. Қос елдің шекарашылары достық сапар аясында Каспий теңізін қорғау мәселесі бойынша бірлескен жедел-профилактикалық шаралардың қорытындысын шығарады, - деп хабарлайды mangystaumedia.kz сайты.
Каспий теңізінің биоресурстарын қорғау, контрабандамен және заңсыз көші-қонмен күресу мақсатында Қазақстан, Ресей Федерациясы және Әзірбайжан Республикасы бірлесіп жедел-профилактикалық шараларды жүргізуді қолға алған. Мұндай шара жылына екі рет өткізіледі.
Делегацияны Дағыстан Республика бойынша Ресейдің Федералдық қауіпсіздік қызметінің шекаралық басқарма басшысы, генерал-лейтенант Алексей Буеров және басқарма басшысының орынбасары, контр-адмирал Вячеслав Игнатенко бастап келді.
«Қазақстанға келудегі мақсатымыз – теңіз шекарасын қорғау үшін бірлесіп жүргізген жұмыстардың қорытындысын шығару. Басқосуда күз мезгілінде өтетін шараларды нақтылап, тактикалық әдістерді талқылаймыз. Сонымен қатар достық қарым-қатынас орнатып, тәжірибе алмасамыз», - дейді Дағыстан Республика бойынша Ресейдің Федералдық қауіпсіздік қызметінің шекаралық басқарма басшысы, генерал-лейтенант Алексей Буеров.
Айтуынша, Ресей Федерациясының шекарашылары соңғы жылдары Каспий теңізінің тыныштығын бақылауда және браконьерлермен күресуде жақсы нәтижеге қол жеткізіпті.
https://www.youtube.com/watch?v=TvRKCDi06KA
«Сәуір, мамыр айларындағы бірлескен шара барысында Қазақстанда 117 адам шекара бұзғаны үшін ұсталды. Түрлі қайық пен құралдың 59 түрі табылды. Сондай-ақ 163 125 метр ау, 76 195 ілмекті қорап және әртүрлі браконьерлік құрал-жабдықтар тәркіленді. Бекіре тұқымдас балықтың 923-ін құтқарып, қайтадан теңізге жібердік. Екі айда атқарылған шаралардың нәтижесінде 2 347 650 млн теңге айыппұл салынды», - дейді ҚР ҰҚК ШҚ Жағалау күзеті басқармасы басшысының орынбасары Талғат Төребаев.
Ресейлік шекарашылар үш күнге дейін Ақтау қаласында болмақ. Айта кетейік, қазақстандық шекарашылар да «Сарбаз» шекара кемесімен Әзірбайжанға достық сапарға аттанады. Ал жазда Махачкала қаласына барып, теңіз шекарасын қорғап, браконьерлерге қарсы шараларды ұйымдастырмақ.
Жұлдызай ҚАЛИЕВА
Суреттер мен видеоны түсірген Талант ҚҰСАЙЫН
[gallery td_select_gallery_slide="slide" ids="80808,80809,80810,80817,80816,80811,80813"]
986
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
