Маңғыстауда «Батыс-2018» командалық-штабтық оқу-жаттығуы өтті

Маңғыстау облысында «Батыс-2018» командалық-штабтық оқу-жаттығуы өтті. Ауқымды стратегиялық шараға қару-жарақтармен, техинкалармен қамтамасыз етілген 5 мыңнан аса әскер тартылған. Жаттығу барысында құрлықтағы әскер, әуе қорғанысы күштері, әскери теңіз күштері, арнайы опера­циялар күштері, материалдық-техникалық қамтамасыз ету құрылымдары таныстырылды. Оқу-жаттығу жоспары бойынша Қазақстанның батыс өңірінде қаруланған заңсыз құрылым сал­дарынан ахуал күрделене түскен. Осыған бай­ланысты «Батыс» өңірлік қолбасшылығы әскерилері қолбасшыларының жетекшілігімен жағдайды тұрақтандыруға міндетті әскери топ құрылды. «Оңтүстік», «Шығыс» аймақтық әскери бөлімдері мен десанттық-шабуылдаушы әскерилер Маңғыстау облысындағы «Батыс-2018» жаттығуына арнайы келіп қатысты. Жаңаөзен қаласынан 25 шақырым қашықтықтағы оқу-жаттығу алаңына жету үшін әскерилер үш бағыт: Сайөтес, Шетпе және «Оймаша» полигоны арқылы жүрді. Құрлық әскері, ұшқыштар мен теңіз күштерінен құрылған бұл құрылымдармен қатар оқу-жаттығу шарасына шекара қызметі, Ұлттық гвардия мен Қазақстан Респу­бликасы ІІМ Төтенше жағдайлар комитеті де жұмылдырылған. «Батыс-2018» стратегиялық командалық оқу-жаттығуының жетекшілігі Қорғаныс министрінің орынбасары, бас штабтың басшысы, генерал-лейтенант Мұрат Майкеевке тапсырылған. ТАҒЫ ОҚЫҢЫЗ: Каспийдің жағалауын «Каспийге» басқаруға бермек - Оқу-жаттығу жұмыстары 10 күнге жалғасады. Ең басты мақсат - мобильдік және әскерилерді кез келген аймаққа жеткізу. Біз бұл жаттығу жұмыстарын Жоғарғы бас қлобасшының жарлығы негізінде әскерилерді қауіп-қатер туған кез келген бағытта жаттықтыру бойынша жүргізіп жатырмыз. Алғашқы кезеңнің тапсыр­малары ойдағыдай орындалды, команда жетекшісіне үлкен топтар бағындырылды және командалық штабқа авиацияны және ұшқышсыз ұшу аппараттарын басқару, барлық материалдық-техникалық жабдықтарды игеру, жөндеу жөніндегі жұмыстарды меңгеру, сондай-ақ, екі саперлік полкті басқару негізгі міндеттер ретінде беріледі, - деп атап өтті ҚР Қорғаныс министрінің орын­басары Мұрат Майкеев. Жаттығу жұмысында «Батыс» өңірлік қолбасшылығы әскерилерінің жетекшісіне әскери міндеттерді орындау мақсатында әскерді оқу алаңына алып келу және өңірге келген «Шығыс», «Оңтүстік» өңірлік қолбасшылығы құрылымдары мен десанттық-шабуылдаушы әскерилерін топтастыру міндеттері қойылды. Ал фронттық әскермен әуе шабуылы аэродромдарға бағытталса, әскери авиация тікұшақ алаңдарына топтастырыл­ды. Әскери теңіз күштері тобы әскери кеме­лермен және Ұлттық қауіпсіздік комитетінің теңіз техникаларымен қамтылды.

Өз тілшіміз