Маңғыстау облысының әкімдігінде «Қазақстан Республикасының Үкіметі айқындаған жұмыс күші аз өңірлерге азаматтарды ерікті қоныс аударуға ықпал ету және еңбек ресурстарының ұтқырлығын арттыру жөніндегі іс-шаралар жоспары және «Нәтижелі жұмыспен қамту және жаппай кәсіпкерлікті дамыту» мемлекеттік бағдарламасы аясында еліміз бойынша жұмыс күші тапшы өңір ретінде Павлодар, Солтүстік Қазақстан, Шығыс Қазақстан және Қостанай облыстары ұсынылған болатын. Ал адам саны көп өңір ретінде Оңтүстік Қазақстан, Жамбыл, Алматы, Маңғыстау облыстары айқындалды.
Осыған байланысты, Маңғыстау облысы жұмыспен қамту және әлеуметтік бағдарламалар басқармасы мен Солтүстік Қазақстан, Қостанай, Павлодар, Шығыс Қазақстан облыстары жұмыспен қамту және әлеуметтік бағдарламалар басқармалары өкілдерінің арасында, жұмыс күші тапшы өңірлерге халықты ерікті қоныс аударуға ықпал ету туралы бірлескен іс-әрекеттер меморандумы жасақталды. Бағдарлама шеңберінде сейсенбі күні Жаңаөзен қаласына республикалық бос жұмыс орындар жәрмеңкесін ұйымдастыруға және қала кәсіпкерлерімен кездесуге аталған облыстардан өкілдер келді.
Кездесуде Жаңаөзен қаласының әкімі Әділбек Дауылбаев жұмыс күші тапшы өңірлерді жұмыс күшімен қамтамасыз ету, өңірлердегі диспропорция мен демографиялық теңгерімсіздікті жою мақсатында «Нәтижелі жұмыспен қамту және кәсіпкерлікті дамыту» бағдарламасы жасақталғанын айта келіп:
- Қоныс аударуға ниет білдіргендердің бір легі - Жаңаөзен қаласы. Бұл бағытта жұмысты қала әкімдігі қарқынды жүргізіп келеді. Мұндай игілікті шараға аймақтың кәсіпкерлері де қызығушылық танытып отыр. 2017 жылдың мамыр айында алғаш рет Жаңаөзен қаласында ерікті қоныс аударушылар форумы өткен. 150-ден астам адам қатысқан форум нәтижесінде Павлодар, Солтүстік, Шығыс Қазақстан облыстарына 7 отбасы (24 адам) көшіп, олар жалдамалы тұрғын үйлермен және тұрақты жұмыспен қамтамасыз етілді, субсидия ретінде 1 248 640 мың теңге төленді, біржолғы көмек - әр отбасыға 110 мың теңге, «Өрлеу» жобасымен шартты ақшалай көмек 6 айға - 675 102 теңге көлемінде әлеуметтік көмектер тағайындалды», - деді.
Сөз алған Маңғыстау облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Аманғали Бердәулетов, Павлодар облысы жұмыспен қамту және әлеуметтік бағдарламалар басқармасы мен көші қон бөлімінің басшысы Меруерт Есенаманова, Қостанай облысы Наурызым ауданы Қожа ауылының әкімі Айгүл Әлімқазықызы да бағдарламаның шарттары, көрсетілетін жеңілдіктер туралы айтып өтті.
Мамандардың сөзінен кейін қоныс аударуға ниет білдірген азаматтар көрсетілген аймақтардан келген өкілдерге жолығып, өздеріне қажетті ақпарат алып, түйіндемелерін тапсырды. Кәсіпкерлер мен жеке бизнес ашуға ниет білдірушілерге де Солтүстіктен келген сала мамандары кәсіптің қыр-сыры жайында түсінік беріп, сұрақтарына жауап берді.
ТАҒЫ ОҚЫҢЫЗ: Маңғыстау өнеркәсіптік өнімнің нақты көлем индексі бойынша 2-орындаСұраныс көп жағдайда ұстаздар қауымына түседі екен. Атап айтқанда, орыс, ағылшын, биология, химия, физика пәндерінің мұғалімдері, сонымен қатар, дәрігер, ауыл шаруашылық мамандары, бухгалтер, экономист, аудармашы, слесарь, жүргізуші, электрик, токарь, аспаз, шаштараз мамандары да тапшы екен. Жәрмеңкеде Солтүстік Қазақстан және Қостанай облыстары бойынша барлығы 587 бос жұмыс орны ұсынылды. Жаңаөзен қаласынан бұл өңірлерге көшуге 25 отбасы (83 адам) ниет білдірді.
Айжан НАСЫРОВА
Суреттерді түсірген Мұратбай ҰЛЫҚПАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
