Жағалауды жайлы ететін жоба таныстырылды

©

Ақтау – еліміз бойынша теңіз жағалауында орналасқан бірден-бір қала. Қарт Каспийдің толқынымен үндесіп жатқан өңір күн санап өркендеп, дамып келеді. Биік-биік ғимараттар бой көтеріп, қала танымастай өзгеруде. Әсіресе теңіз жағалауы сәндене, әрлене түсуде. Онда тұрғындар теңіздің саф ауасымен тыныстап, қысы-жазы сейіл, серуен құрады. Ол жерлерде мүгедек жандардың да емін-еркін жүруі басты назарға алынып, заманға сай салынып жатқан жайлы жағдаяттарға куә болып жүрміз.

Қазіргі таңда елімізде қоғамдағы зағип жандарға жағдай өз деңгейінде жасалып, оларға көп көңіл бөлініп жатқаны баршамызға мәлім. Мұны қуантарлық жағдай деуімізге де болады. Зағип жандар құжаттармен мекемелерге, ауруханаларға немесе дүкен орталықтарына бара қалса, оларға арнайы жасалған пантус­тар немесе қоңыраулар  қойылған.  Бұл – олардың   қоғамнан өздерін тыс қалдырмауына жасалып жатқан үлкен мүмкіндік.

ТАҒЫ ОҚЫҢЫЗ: Шайыңды құйшы, келінжан!

Осы орайда облыстық әкімдікте дөңгелек үстел өтті. Онда көзі нашар көріп, құлағы естімейтін және қоларбаға таңылған жандар жиналды.

Жиында теңіз жағасында жасалатын «Скальная тропа» жобасы кеңінен талқыланды. Теңіз жағалауында демалып, сарқыраманы жақындап көруге және жаз айларында  шомылуға  болатын керемет жоба іске асырылмақ. Жобаның қала және облыс тұрғындары мен қонақтарына, сондай-­ақ мүмкіндігі шектеулі азаматтар­ға арналған ақшаңқан Ақтаудың көрнекі жерлерінің бірі­не айналары анық. Сондай­-ақ жобада мүмкіндігі шектеулі жандарға арналған дәретханалар ойластырылған.

Жиында жобаны  зағип  жандарға  таныстырып,  олар­дың жоба жайлы өз ойлары мен пікірлері тыңдалды. Жоба­ны жүзеге асыру барысында аталған жандардың пікірлері назарға алынатындығы жөнінде Маңғыстау облысы әкімі­нің мүгедектердің құқығын қамтамасыз ету және жағдайын жақсарту жөніндегі кеңесшісі Владислав Трифонов атап өтті. Кездесу соңында сұрақтар қойылып, жиынға келгендер бастаған бастамаларға алғыстарын білдірді.

Зухра ӘБДІЛ-САТТАР