Өмірзақтағы өзекті мәселелер қандай?

Өткен сейсенбіде Өмірзақ ауылының әкімі Ербол Сарыев ауыл жұртшылығы алдында атқарылған жұмыстардың есебін қорытып, қол жеткен табыстармен қатар осы жылдың еншісіндегі жоспарлар мен міндеттерді нақтылап өтті. Есеп беру жиынына Ақтау қаласының әкімі Серікбай Тұрымов, оның орынбасарлары, қалалық мәслихат хатшысы Марат Молдағұлов, мемлекеттік мекеме басшылары, ауыл тұрғындары және БАҚ өкілдері қатысты.

Есеп беру жиынына жиналған жұртшылыққа ауыл әкімі Ербол Сарыев әр сала бойынша жүзеге асқан істерді баяндады.

–Қазіргі таңда Өмірзақ ауылында дәрігерлік амбулатория және Рауан тұрғын массивінде медициналық пункт жұмыс жасайды. Бұл мекемелерде 11 адам халыққа дәрігерлік қызмет көрсетеді. Өмірзақ ауылындағы №27 орта мектепте 72 мұғалім қызмет етсе, 583 оқушы білім алады. 2015-2016 оқу жылының қорытындысы бойынша Ұлттық бірыңғай тестілеуге қатысқан 8 түлектің орташа ұпай көрсеткіші 75,4%- ды құрады. Өмірзақта жеке кәсіпкерлердің қаржысына Приморский, Приозерный-1, Приозерный-3 ауылындағы 345 орындық балабақшаның әрқайсысы 10- нан аса тұрғынды жұмыспен қамтып отыр. «Дипломмен ауылға» бағдарламасы бойынша орта мектепке география және дене шынықтыру пәнінің 2 мұғалімі жұмысқа қабылданды, – деді ауыл әкімі Ербол Рзаханұлы.

Ауыл әкімі келтірген статистикалық деректерге зер салсақ, Өмірзақ ауылы мен оған қарасты елді мекендердегі халық саны– 5337. 2017 жылдың 1 қаңтарындағы есеп бойынша туылған балалар саны – 94, әлеуметтік көмек алатын мүгедектер саны – 12. Ауылдың 78 тұрғыны жұмыссыздыққа тіркелген болса, 64 адам жеке кәсіпкерлікпен айналысады. 2016 жылдың бекітілген бюджеттік жоспары бойынша Өмірзақ ауылы әкімінің аппаратына республикалық және жергілікті бюджеттен 158,141 мың теңге көлемінде қаржы бөлінген. Атап айтсақ, республикалық қазына қаржысына Өмірзақ ауылының жылу қазандығы мен 19,20 көшелеріндегі кәріз жүйелеріне ағымдағы жөндеу жұмыстары жасалған. Жергілікті бюджеттен ауыл көшелерін жарықтандыруға, мәдени және спорттық шаралар өткізуге, ауылды көгалдандыру және абаттандыруға, санитарлық тазалыққа, көлік жолдарын, ауыз су және кәріз құбырларын ағымдағы жөндеуге қаржы бөлініп, толықтай игерілген.

Сондай-ақ жиын барысында Ақтау қаласының әкімі Серікбай Тұрымов облыс орталығының 2015 жылдағы әлеуметтік- экономикалық дамуы туралы есеп берді. Есепті кезеңде еңсерілген істерге екпін беріліп, жыл еншісіндегі жоспарлар мен міндеттерді нақтылап өтті. Әкімдердің баяндамасы тыңдалғаннан кейін тұрғындар көкейде жүрген сауалдарын қойып, өтініш-тілектерін білдіріп, жылдық есепке бағаларын берді. Ақтау қалалық мәслихатының депутаты Ахмет Бүркітбаев Рауан, Приозерный, Приморский ауылішілік жолдарын жөндеу, Өмірзақтың кәріз жүйесін реттеу және спорт зал салу мәселесін көтерді. Ауылдың үлкендері полиция пункті жоқтығын, ауыл айналасындағы ұзаққа созылған құрылыстардың салдарынан халықтың теңіз жағасына баруға мүмкіндігі болмай отырғандығын жеткізді.

–Приморский ауылының кейбір көшелерінде жарық жоқ. Ауылішілік жолдарға асфальт болмаса, құмды- қиыршық тас төгіп берсеңіздер екен. Ауылдың ішіндегі күл- қоқыстан арылмай, ит пен мысықтың мекеніне айналған жерлерді тазартып, балаларға ойын алаңын салып беруге болмай ма? Ауылға кабельді интернет жүйесі қашан тартылады? Көшеде иесі жоқ бұралқы иттерді ату жұмыстары жүйелі жүргізілсе екен. Жергілікті учаскелік полицияны танымаймыз. Неге халықпен жұмыс жасамайды?, – деп сауал қойды ауыл тұрғыны Қожа Селбай.

Көрпеш Жайнекова Өмірзақ ауылына мәдениет үйі салыну қажеттігін және дәрігер маман жетіспейтінін қаперге салды. Приморский ауылының тұрғыны Орынбек Айзақов ауылдағы үйлердің арасы тығыз орналасқандықтан өрт қауіпсіздігі талаптары сақталмай отырғандығын назарға берді.

«Рауан тұрғын массивінің ауылішілік жолының жобасы жасақталуда. Биыл салуға жұмыстанамыз. Өмірзақ ауылының кәріз жүйесін іске қосамыз. Спорт зал салу мәселесі басты назарымызда. Приозерныйда балалар ойын алаңын салу туралы ұсыныстарыңызды ескереміз. Бұл ауылдың жолына қаражат бөлініп тұр. Приморскийдегі өрт қауіпсіздігі мәселесі өте қиын. Себебі, кезінде үй салуға жер берілген кезде бас жоспар болмаған. Полиция пунктін салуды қарастыратын боламыз. Қаңғыбас иттерді ату мәселесінде бірқатар қиыншылықтар бар. Приозерный -2-де кәріз жүйесін жасауға мүмкіндік бар. Балабақша салуға келсек, жобалық- сметалық құжаттамасы бітіп тұр. Алдағы уақытта мемлекеттік- жекеменшік әріптестік аясында салу жолдарын қарастырамыз. Приморскийге асфальт жол төселеді. Кейбір көшелер кезінде жобаға енбей қалғандықтан жарықпен қамтылмаған. Сондықтан қайта жоба жасақтаймыз» деген Ақтау қаласының әкімі Серікбай Тұрымов көтерілген мәселелер мен ұсыныс- пікірлер ескерілетінін хабарлады.

Жиын барысында сөз сөйлеген тұрғындар ауыл және қала әкімінің есебіне оң бағасын беріп, алдағы уақытта да жұмыстар жүйелі атқарылатынына сенімділік білдірді.

Фарида МҰҢАЛҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.