Зумба қандай спорт: артық салмақтан қалай арыламыз?

Көктем келісімен көпшілік қалың киіммен қатар, артық салмақтан да арылуға көшеді. Ал салмақтан арылушылардың дені спорт залдарды жағалайды. Бүгінде фитнестің түрі көп. Соның бірі латын америка және әлем билеріне негізделген - зумба. Ақтауда, жалпы елімізде соңғы 5 жылда кең етек алған спорт түрі. Осы спорттық бидің қаладағы санаулы жаттықтырушыларының бірі Арай Серікқалиқызымен сұхбатты ұсынамыз.  - Алдымен зумба биінің тарихына тоқталсақ. Бұл қандай спорт, қайда, қашан пайда болған? - Зумба - қазіргі таңда қарқынды дамып келе жатқан спорт түрі. Оны 2000 жылдары колумбиялық фитнес жаттықтырушы Альберто Перес ойлап тапқан. Қазіргі таңда лицензиясы бар фитнес түрлерінің қатарында. Әлемнің 186 еліне тараған. Статистика бойынша әлемде күн сайын 15 млн тұрғын зумбамен тұрақты айналысады. - Сонда бұның спорттық жаттығулардан артықшылығы неде? - Зумбаның ерекшелігі өте көп. Мұнда ешқандай спорттық құрал-жабдық қолданылмайды. Зумбамен күнделікті айналысып жүрген адам шаршамайды. Қан айналымы, жүрек жұмысы жақсарып, тыныс алу жолдары толығымен ашылады. Зумбаға тіпті протрузиясы бар, белі ауыратын адамдардың қатысуына да болады. Мұнда келген адамдардың ұйқылары қанық болып, таңда сергек оянады. Тіпті жаттығудан соң да шаршау болмайды. - Зумба арқылы қалай салмақ тастауға болады? - Кез келген спорт адам денсаулығы үшін пайдалы. Артық салмақтан арылуға да септігін тигізеді. Зумба да фитнес бағыттарының бірі болғандықтан адам денсаулығына пайдасы өте зор. Қазіргі кезде артық салмақ көп адамның «бас ауруына» айналған. Өйткені қозғалыс аз. Бұл белдің ауруына, арқа мен мойынға тұз жиналуына (остеохондроз) әкеп соғады. Соның барлығы - қимылдамағандықтан. Зумбамен айналысқанда дененің барлық бұлшықеті қозғалыста болады. Мұнда қы-келіншектер арықтауға үшін ғана емес, бұлшық етін қатайту үшін де келеді. - Жаттығу залына келер бұрын нені білу керек? - Бастысы көңіл-күй. Мұнда ешқандай спорттық жабдық қолданбаймыз. Сондықтан аса талап жоқ. - Неше жастан бастап қатысуға болады? - Зумбаның түрі көп, балалардан бастап егде жастағы кісілер үшін арнайы бағдарламалар бар. Бассейнге арналған «аква зумба», соңғы уақытта жақсы қарқын алып келе жатқан, күш-қайратты арттыратын «стронг бай зумба» деген түрлері бар. Залға келетіндердің ең үлкені - 65 жастағы кісі. Сондықтан мұнда жасқа шектеу жоқ. - Салмақ тастау үшін жаттығумен қатар дұрыс тамақтана да білу керек қой. Тамақтану ережелері туралы айтсақ. - Жаттығудан 1-1,5 бұрын тамақтанған дұрыс. Залға келер кезде майлы тамақ жемеген жөн. Өйткені дұрыс тамақтанбау жаттығу барысында кері әсер етуі мүмкін. Ал жаттығудан соң кейін 1-2 сағаттан соң жеңіл тамақтануға болады. Күніне әр адам 1,5-2 литр су ішуі керек. Ал жаттығу кезінде ағза құрғамауы үшін би арасында суды мөлшермен ішу керек. - Аптасына неше рет жаттыққан дұрыс? - Бұл әркімнің физикалық мүмкіндігіне қарай, тіпті күнде айналысуға да болады. Жалпы зумба сабақтары аптасына 3 рет қойылған. Бір жаттығу 50 минутқа созылады. - Барлығы нәтижеге бірден қол жеткізгісі келеді ғой. Жалпы зумбамен айналысқан адам қанша уақытта нәтижеге жетеді? - Нәтиже ағзаға байланысты. Кейбіреулер 1-2 айда нәтижеге жетеді. Керсінше кейбіреулер 3-4 айда да өзгермейді. Демек, гормоны дұрыс жұмыс жасамауы мүмкін. Жалпы, кез келген адам көбірек жаяу жүріп, аптасына 3 рет тұрақты түрде залға баруы керек. - Сөз соңында өзініңіз туралы айтсаңыз. - Өзім - эстрадалық, халықтық билерді орындаған бишімін. Оқу бітіріп, жұмысқа орналасқан соң қозғалыс азайып, белім ауырып бастады. Әлеуметтік желіден зумба туралы оқып, қатысып көруді ұйғардым. Ол осыдан 3 жыл бұрын болатын. Алғаш рет бәрі түсініксіз болды. Өйткені маған жасап жатқан іс-қимылдарым таңсық еді. Үшінші рет қатысқаннан кейін ұнады, әсіресе, музыкасы тарты. Екі жыл қатысып, үшінші жылы жаттықтырушым өз сыныбымды ашуға кеңес берді. Бірақ сол кезде оқуға мүмкіндік болмады. Бірақ кейін жаттықтырушым Ресейге көшіп кетті де, оқуды ұйғардым. 2018 жылы маусымда Астана қаласында арнайы курстан өтіп, «Халықаралық дәрежедегі зумба тренері» деген сертификат алдым. Мұнымен тоқтамай ай сайын өзімізді жетілдіріп тұрамын. - Сұхбатыңызға рахмет.

Сұхбаттасқан Ақсындар ТАБЫЛДЫ