Мал өсіріп, бордақылап сататындарға қандай талап қойылады?

©

1. «Ветеринария туралы» ҚР Заңының 25-шi бабында «Жануарлардың аурулары, онымен қоса жануарлар мен адамдарға ортақ аурулардың алдын алуда жеке және заңды тұлғалар ветеринариялық-санитариялық қауiпсiздiктi қамтамасыз ету үшiн өз малдарына уақытылы вакцинация (егу), диагностиканы және бірдейлендіру жүргізуге қамтамасыз етуге, ветеринария саласы мамандарына ветеринариялық iс-шараларды, қызметтiк мiндеттердi атқарған кезде көмек көрсетуі қажет» деп, нақты атап көрсетілген. Өзге облыстардан және облыс ішінен жануарларды тасымалдау кезінде ҚР АШМ № 7-1/496 (29.05.2015 ж.), № 7-1/453 (21.05.2015ж.), № 7-1/700 (30.12.2014 ж.) бұйрықтарымен бекітілген «ҚР аумағында орны ауыстырылатын объектілерді тасымал- дауды жүзеге асыру», «Ветеринариялық құжаттарды беру және олардың бланкілеріне қойылатын талаптар», «Жануарларды карантиндеу» қағидалары мен талаптарына сәйкес жүзеге асырылуы тиіс екендігін қаперге береміз. Тасымалдау кезінде, жеке және заңды тұлғалар жануарларды әкелу немесе әкету алдында (жаңадан әкелу, сатып алу, әкету, орнын ауыстыруды жоспарлаған кезде) 1 ай бұрын жергілікті ветеринариялық ұйымдар мен бақылау-қадағалау органдарына хабарлауы тиіс. Сонымен қатар ҚР АШМ № 16-04/679 (19.12.2014 ж.) бұйрығының 4-тармағына сәйкес жеке және заңды тұлғалар 3 жұмыс күні ішінде жаңадан (сатып) алған жануарлар, оларды өткізу (сатуы) туралы жергілікті ветеринариялық ұйымдар (ветстансаға) мен бақылау-қадағалау органдарына хабарлауға міндетті. Жануарларды тасы­малдау барысында мін­детті болуы керек: 1) ветеринариялық анықтама (бұдан әрі ветанықтама) – бұл құжат жануарларды бір орыннан екінші орынға тасымалдап алып жүру құжаты. Оның ішіне көлік түрі (нөмірі), маршруты, мал иесі және сатып алушы, межелі пункті, т.б. нақты көрсетілуі қажет. 2) ветеринариялық паспорт – бұл құжаттың ішіне жануардың барлық мәліметі жазылады: жасы, жынысы, түрі, түсі және профилактикалық, диагностикалық іс-шаралар, т.б. Ветпаспорт ірі малдардың әр басына, ұсақ малдардың тобына беріледі. 3) автокөлікті домдау (дезинфекциялау) құжаты. 4) құлақ сырғалары (жылқыларда микрочип) болуы және олар ілеспе құжаттарға сәйкес болуы тиіс. 2. Жануарларды өсіруді, жануарларды союға дайындауды (союды), сақтауды, өңдеуді және сатуды жүзеге асыратын өндіріс объектілеріне, сондай-ақ ветеринариялық препараттарды, жем және жемазық қоспаларын өндіру, сақтау және сату бойынша өндіріс объектілеріне тіркеу нөмірлерін беру (алу) керек.

Н.БАТЫРОВ, Қарақия аудандық ауыл шаруашылығы және ветеринария бөлімінің бас маманы