Мамандар үй кезегіне тұруға қандай құжаттар қажеттігін түсіндірді

©

«Түпқараған аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімі» мемлекеттік мекемесіне қатысты тұрғын үй кезегі жайында аудан тұрғындарына арнайы ақпарат беруді жөн көрдік. Бүгінгі таңдағы өзекті мәселе туралы осы мекеменің маманы Айбек Даншабаевты сөзге тарттық. Қазіргі таңда аудан бойынша тұрғын үй кезегінде 649 адам кезекте тұр. Атап айтқанда: мемлекеттiк қызметшiлерге, бюджеттiк ұйымдардың қызметкерле­рiне, әскери қызметшiлерге, ғарышкерлікке кандидат­тарға, ғарышкерлерге, арнаулы мемлекеттік орган қызметкерлеріне және мемлекеттiк сайланбалы қыз­мет атқаратын адамдар – 341. Халықтың әлеуметтiк жағынан осал топтары – 251. Кәмелетке толғанға де­йiн ата­-аналарынан айырылған жиырма тоғыз жасқа толмаған жетім балалар мен ата-­анасының қамқор­лығынсыз қалған балалар – 48. Жалғыз тұрғын үйі Қазақстан Республикасының заңнамасында белгі­ленген тәртіппен авариялық жағдайда деп таныл­ғандар – 9. Мемлекеттік тұрғын үй қорынан тұрғын үй немесе жеке тұрғын үй қорынан жергілікті атқарушы орган жалдаған тұрғын үй алу үшін ең алдымен кезекке тіркелуіңіз қажет. 1997 жылғы 16 сәуірдегі ''Тұрғын үй қатынастары туралы'' Қазақстан Республикасының Заңының 67 және 68-бабына сәйкес төмендегі санаттар бойынша тұрғын үй кезегіне тіркеле аласыздар.

• Ұлы Отан соғысының мүгедектері мен қаты­сушылары;

• Ұлы Отан соғысының мүгедектері мен қатысушыларына теңестірілген адамдар;

• 1 және 2 топтағы мүгедектер;

• Мүгедек балалары бар немесе оларды тәрбиелеушi отбасылары;

• Қазақстан Республикасының Үкіметі бекiтетiн аурулар тiзiмiнде аталған кейбiр созылмалы аурулардың ауыр түр­лерiмен ауыратын адамдар;

• Жасына қарай зейнет демалысына шыққан зейнеткерлер;

• Кәмелетке толғанға дейiн ата-­аналарынан айырылған жиырма тоғыз жасқа толмаған жетім балалар мен ата-­ана­сының қамқорлығынсыз қалған балалар жатады. Мұндай адамдардың жасы әскери қызметке шақырылған кезде мерзiмдi әскери қызметтен өту мерзiмiне ұзартылады;

• Оралмандар;

• Экологиялық зiлзалалар, табиғи және техногендi сипаттағы төтенше жағдайлар салдарынан тұрғын үйiнен айырылған адамдар;

• Көп балалы отбасылар;

• Мемлекеттiк немесе қоғамдық мiндеттерiн, әскери қызметiн орындау кезiнде, ғарыш кеңістігіне ұшуды дайындау немесе жүзеге асыру кезінде, адам өмiрiн құтқару кезiнде, құқық тәртiбiн қорғау кезiнде қаза тапқан (қайтыс болған) адамдардың отбасылары;

• Толық емес отбасылары жатады.
• Мемлекеттiк қызметшiлерге, бюджеттiк ұйымдардың қыз­меткерлерiне, әскери қызметшiлерге, ғарышкерлікке кандидат­тарға, ғарышкерлерге, арнаулы мемлекеттік орган қызмет­керлеріне және мемлекеттiк сайланбалы қызмет атқаратынадамдарға;
• Жалғыз тұрғын үйі Қазақстан Республикасының заңна­масында белгіленген тәртіппен авариялық жағдайда деп та­нылған Қазақстан Республикасының азаматтарына жататын Қазақстан Республикасы азаматтарының пайдалануына бе­ріледі.

"Жоғарыда көрсетілген санаттар бойынша тұрғын үй кезегіне тіркелу үшін: «Азаматтарға арналған үкімет» мемлекеттік корпорациясы» коммерциялық емес акционерлік қоғамының Маңғыстау облысы бойынша филиалының халыққа қызмет көрсету бойынша Түпқараған ауданының бөліміне (ЦОН) немесе ЭЦҚ – (электронды цифрлы қолтаңба) арқылы үйден шықпай­-ақ, жеке өзіңіз www.egov.kz сайтының онлайн қызметі арқылы өтініш білдіре аласыздар. Қандай да бір сұрақтарыңыз болса, «Түпқараған аудандық тұрғын үй­-коммуналдық ша­руашылығы, жолаушылар көлігі және автомобиль жолдары бөліміне келуіңізге немесе 8/72938/ 23156, 23158, 23184 байланыс телефонына хабарласуына болады, ­- дейді маман.

Өз тілшімізден