Мұнайлыда 5 мектеп салу жоспарланып отыр

Бұл туралы аудан әкімі Рахат Елтизаров халық алдындағы есеп беру кездесуінде айтты, - деп хабарлайды mangystaumedia.kz сайты.

Қызылтөбе, Батыр ауылдық округтерінен, Бесшоқы тұрғын үй массивінен және Басқұдық ауылдық округінен 1200 орындық 4 мектеп және 600 орындық бір мектептің жобалық-сметалық құжаттары мемлекеттік сараптамаға тапсырылған.

Бүгінде Мұнайлыдағы 16 мектеп 33 мыңға жуық балаға білім береді. Ауданда оқушылар саны жыл санап артып келеді. Бала санының көптігіне байланысты мектептерде үш ауысымдық жүйе бар. Сол үш ауысымдық жүйені болдырмау мақсатында білім ордаларының қатары артпақ.

Сонымен қатар, Мұнайлыда 14 мемлекеттік, 60 жекеменшік балабақша жұмыс жасайды. Биыл бүлдіршіндер 100 пайыз балабақшамен қамтылған.

Айта кетейік, әлеуметтік саланың аса маңызды бөлігі білім саласына аудан бюджетінің 55,8%-ы бөлінген. Ой-өрісі кең, сауатты ұрпақ өсіру мақсатында білім саласы басты назарға алынып отыр.

Махаббат НҰРЖАНҚЫЗЫ

Суретті түсірген Сәби МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.