Ғазиз Надуев: Маңғыстау облысында эпидемиологиялық ахуал нашарлап барады

Өңірде соңғы тәулікте коронавирус инфекциясын 200 адам жұқтырған. Бұл туралы қоғамдық коммуникация орталығында өткен брифингте Маңғыстау облысы санитариялық-эпидемиологиялық бақылау департаментінің басшысы Ғазиз Надуев мәлімдеді.

Ауырғандардың басым бөлігі Ақтау қаласының тұрғындары. Ақтау қаласы бойынша 91 жағдай тіркелген. Ал Жаңаөзенде – 19, Түпқараған ауданында – 14, Қарақия ауданында – 3, Маңғыстау ауданында – 6, Бейнеу ауданында -22, Мұнайлы ауданында - 45 жағдай анықталды.

Шағыммен қаралған науқас – 156 (78,0%), шағымсыз қаралғандар саны – 44 (22%).

Өңірде эпидемиологиялық жағдай нашарлап барады. Соңғы екі аптада коронавирус жұқтырған 690 жағдай тіркелген. Қазір карантиндік шараларды күшейту бойынша арнайы қаулы әзірленіп жатыр. Соңғы тәулікте өңірде 200 адам коронавирус жұқтырған. Тіркелген 200 науқастың ауруханаға жатқызылғаны - 17, үй жағдайында - 183. Стационарларда жатқан науқастар саны 1 қаңтарда 23 адам болса, бүгінгі күні олардың саны 99 адамға, яғни 4 есеге дейін өсті. Оның 56-сы оттегі көмегімен демалуда, - деді Маңғыстау облысы санитариялық-эпидемиологиялық бақылау департаментінің басшысы Ғазиз Надуев.

Дәрігерлер коронавирустан сақтанудың бірден-бір жолы вакцина салдыру дейді. Қазіргі таңда вакцинаның бірінші компонентімен 193 679 адам (49,9%), екінші компонентімен 176 439 адам (45,4%) қамтылды.

Бүгінде 11 432 адам ревакцинациядан өткен.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.