Мұнайлыда серпін бар

Жуырда Мұнайлы ауданының әкімі Рахат Елтизаров 2019 жылы атқарылған жұмыстардың қорытындысы және жаңа жылға арналған даму жоспары бойынша тұрғындар алдында есеп берді. Кездесуге облыс әкімі Серікбай Трұмов, облыстық басқарма басшылары мен аудан тұрғындары қатысты.

Аймақ басшысының тапсырмасымен ауданның әлеуетін арттыруға бағытталған істер сәтті орындалып, оң нәтиже көрсетіп отыр.

Мардымды инвестициялық жобалар жасалды

Былтыр Мұнайлыда 35 жеке инвестициялық жоба жүзеге асып, 690 жұмыс орны құрылған. Жеңіл өнеркәсіп саласында 1 жоба, туризмді дамыту саласында 1 жоба, спорт саласын дамыту бойынша 4 жоба, білім саласын дамыту бойынша 17 жоба, мейрамхана ісі бойынша 7 нысан, 4 сауда орталығы мен супермаркет іске қосылған. Отандық инвесторлардың бастамасымен жүзеге асқан мардымды жобалар бүгінде аудан тұрғындарының пайдасына жарап, жұмыссыздық көрсеткішінің азаюына ықпал жасап отыр. Елдің әлеуметтік-экономикалық ахуалын көтеруге бағытталған жобалар аудан дамуына елеулі үлес қосары анық.

Білім – болашақтың бастауы

Бүгінде Мұнайлыдағы 16 мектеп 33 мыңға жуық балаға білім береді. Ауданда оқушылар саны жыл санап артып келеді. Бала санының көптігіне байланысты мектептерде үш ауысымдық жүйе бар. Сол үш ауысымдық жүйені болдырмау мақсатында аудан бойынша жалпы 5 білім ордасын салу жоспарланып отыр. Қызылтөбе, Батыр ауылдық округтерінен, Бесшоқы тұрғын үй массивінен және Басқұдық ауылдық округінен 1 200 орындық 4 мектеп және бір 600 орындық мектеп құрылыстарының жобалық-сметалық құжаттамалары мемлекеттік сараптамаға тапсырылған.

Ауданда 14 мемлекеттік, 60 жеке меншік балабақша жұмыс жасайды. Биыл бүлдіршіндерді 100 пайыз балабақшамен қамтуға қол жеткізілді.

Әлеуметтік саланың аса маңызды бөлігі саналатын білім саласына жалпы аудан бюджетінің 55,8%-ы бөлінген.

Ой-өрісі кең, сауатты ұрпақ өсіру мақсатында білім саласы басты назарға алынып отыр.

Әлеуметтік қолдау – басты мақсат

2019 жылы 4 000 жұмыс орны құрылады деп жоспарланған ауданда 4 300 азамат жұмыспен қамтылған.

Облыс әкімінің тапсырмасы бойынша атаулы әлеуметтік көмек алып отырған көп балалы отбасыларға 100 мың теңгеден бір жолғы жәрдемақы тағайындалған.

2020 жылдың басында аудан бойынша 3 232 отбасы АӘК алып, 4 247 көп балалы отбасы тегін жол жүру куәлігіне ие болған.

Баспана жайы бақылауда

Мұнайлыда «Бақытты отбасы» жоба- сы аясында 47 отбасы баспаналы болып, тұрғын үйге мұқтаж азаматтардың тізімінде есепте тұрған 125 азаматқа осы жоба бойынша баспана алуға жолдама берілген.

2019 жылы Маңғыстау, Батыр ауылдарынан бой көтерген үйде 149 адам қоныс тойын тойлады.

Аудан халқының қолдауымен Батыр ауылдық округінен салынған 2 тұрғын үй «Әр қазақ – менің жалғызым» акциясы аясында баспанаға мұқтаж азаматтарға берілген.

Келелі істер кезегін күтіп тұр

170 мыңға жуық тұрғыны бар бұл ауданға аурухана ауадай қажет болып отыр. Ауданда ешқандай аурухананың болмауына байланысты тұрғындар облыс орталығындағы ауруханада ем алуға мәжбүр. Осыған қатысты аудан әкімі 150 төсектік Мұнайлы аудандық орталық ауруханасының бүгінгі таңда жобалық-сметалық құжаттамасы жасалып, мемлекеттік сараптамаға жолданғанын айтты. Жоба мақұлданғаннан кейін аудан тұрғындарының игіліне жарайтын аурухана құрылысын бастауға ұсыныс берілмек.

Батыр ауылдық округінде ауылішілік 160 шақырым автомобиль жолының жобалық-сметалық құжаттамасына мемлекеттік сараптама орталығы тарапынан қойылған талаптарға сәйкес түзету жұмыстары жүргізіліп жатыр. Мемлекеттік сараптаманың оң қорытындысына қарай қаржыландыру мақсатында тиісті органға бюджеттік ұсыныс беріледі.

Атамекен ауылдық округіне ауылішілік 3 шақырым автокөлік жолының құрылысын бастау бойынша жобалық- сметалық құжаттамасы жасақталып, 2019–2021 жылдарға арналған инвестициялық жобалар тізіміне енгізілген. Жоба тиісті орыннан қаржыландырылса, жаңбыр жауса батпаққа айналатын ауыл көшелеріне сән кірмек.

Басқұдық – Маңғыстау бағытындағы орталық бас жолды кеңейтуге арналған және оның құрылысын бастау үшін қаржы көзін қарастыру мәселесіне қатысты жобалық- сметалық құжаттамаларына мемлекеттік сараптамадан оң қорытынды алынған. 2020 жылға бюджеттік тапсырыс беріліп, жоба құны 4 млрд. 11 млн. теңгені құрап отыр.

Адам көп шоғырланатын орындарға бейнекамералар орнатуға қаржы көзін қарастыру үшін құзырлы орындарға ұсыныс берілген.

Дәулет ауылдық округіндегі көшелерге жарық шамдарын жүргізу мәселесі де шешімін күтіп тұр. Ауылды жарықтандыруға қаражат бөлу үшін ұсыныс берілген.

«Ауданның дамуына үлкен серпін әкелетін – ауданның бюджеті. Соған сәйкес аудан бюджеті өсіп келе жатыр. Мұнайлы ауданының тыныс-тіршілігінің дамуына әр уақытта көңіл бөліп, облыстық деңгейде қаражат бөліп отырамыз», – деді облыс әкімі Серікбай Трұмов.

Мұнайлы ауданы әкімінің есептік баяндамасынан соң облыс әкімі Серікбай Трұмов тұрғындар сауалына жауап беріп, айтылған мәселелерді шешу жолдарын қарастыруға уәде берді. Сондай-ақ аймақ басшысы тез өсіп келе жатқан ең жас ауданның мәселелері назардан тыс қалмайтынын айтты.

Айта кетейік, Мұнайлы – ең жас әрі күн санап көркейіп келе жатқан облыс орталығына ең жақын орналасқан аудан. 2007 жылы құрылған Мұнайлы ауданының бүгінде 169 900 тұрғыны бар.

Махаббат НҰРЖАНҚЫЗЫ