Көлік көп, жүргіншіге жолақ жоқ: Тұрғындар жол қауіпсіздігіне алаңдайды

Ақтау мен Мұнайлы ауданы шектесетін жолда ешқандай қауіпсіздік шарасы сақталмаған. Тұрғындардың айтуынша, жолда жаяу жүргіншіге арналған жолақ жоқ. Бейнебақылау камерасы да орнатылмағанын айтып, шағымданды, - деп хабарлайды mangystaumedia.kz сайты.

14 орта мектеп директорының м.а. Серік Досжановтың айтуынша, білім ордасына 150-ге жуық оқушы 32 в шағынауданынан қатынайды. Себебі - мектеп жоқ. Ал оқушылар өтетін жол қауіпсіздік талаптарына сай емес.

- "Оқушылардың тек өзі емес, ата-анасы да мектепке келеді. Балалардың қауіпсіздігіне алаңдаймыз. Жолда бағдаршам да, жүргіншілер жолағы да жоқ", - дейді 14 орта мектеп директорының м.а. Серік Досжанов.

Мұны Ақтау қалалық жолаушылар көлігі мен автомобиль жолдары бөлімінің бас маманы Бекасыл Алхамов да мойындап отыр. Сондай-ақ 2-тоқсанда аталған жол жөндеуден өтіп, жүргінші жолақтары салынатынын тілге тиек етті.

- "Нұрас" жанармай құю бекеті мен ХҚКО арасындағы жолды жаңарту бойынша жоба бар. Жол қиылыстары бағдаршаммен реттеледі. Тротуар салынып, жарықтандыру жұмыстары жүргізіледі, - дейді Ақтау қалалық жолаушылар көлігі мен автомобиль жолдары бөлімінің бас маманы Бекасыл Алхамов.

Оның айтуынша, бұл жұмыстың барлығы жоба мемлекеттік сараптамадан өтсе ғана орындалмақ.

Айта кетейік, тұрғындар шағымынан соң "Жас Отан" жастар қанатының Маңғыстау облысы бойынша филиалының төрағасы Абзал Марат жол қауіпсіздігіне жергілікті ПД департаменті және Ақтау қаласы әкімдігінің мамандарымен бірге мониторинг жүргізген болатын.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.