Жалпыхалықтық істен шет қалмайық

Туған жерге, оның мәдениеті мен салт-дәстүрлеріне айрықша іңкәрлікпен атсалысу – шынайы патриотизмның маңызды көріністерінің бірі.

Н.Ә. НАЗАРБАЕВ

Жуырда Мұнайлы ауданы әкімдігінде аудан басшысы Нұрлан Тәжібаевтың ұйымдастыруымен аудандағы ірі кәсіпорын басшылары, жанашыр азаматтар, ұйым, мекеме басшы­лары және аудан ақсақалдарының қатысуымен алқалы жиын өтті. Жиында қозғалған басты мәселе – Баянды ауылының іргесінде орналасқан Бердібек қорымын қамқорлыққа алу жайы. Осы маңызды мәселеге Маңғыстау облыстық шырақшылар одағының төрағасы Жамбыл Нұрбаевтың ұсынысы қозғау салған болатын.

Жиында ел ағалары бірлесіп, ақылдаса отырып, негізі ХVІІІ ғасырдан бастау алатын қорымның айналасын қоршау және түнеухана салу жайына тоқталды. Бұл игі іске Мұнайлы ауданындағы ірі кәсіпорындарды, бизнес саласын өркендетіп жатқан кәсіпкерлерді, мал шаруашылығын дамытушы фермерлерді, шағын және орта бизнес өкілдерін, жеке тұлғаларды жұмылдыру керектігін айтты. Жиында жанашыр азаматтардың алғашқы жұмыстарды бастап кеткені де тілге тиек етілді. «Көп түкірсе, көл болады» дегендей, ата-баба зиратының айнала­сын қоршауда заттай және қаржылай қолдау көрсетуден ешкім шет қалмайды деп ойлаймыз. Аудан ақсақалдарының бұл ұсынысын барша жұрт қолдайтынына сенім мол. Өйткені «Өлі разы болмай, тірі байымайды» деген аталы сөзді пір тұтқан ұрпақтың ұландарымыз ғой. Сол үшін осы жалпы халықтық істен тыс қалмай, ұйымшылдық танытайық, ағайын! Елді аузына қаратқан билер мен батырлар, жаны жайсаңдар мен игі жақсылар жерленген қорымның айналасын зама­науи үлгіде қоршап, аяқ асты болуына жол бермейік!

Осы орайда Тұңғыш Президентіміздің «Болашаққа бағдар: рухани жаңғыру» атты құнды мақаласындағы мына аталы сөз еске оралады. Онда: «Туған жердің әрбір сайы мен қырқасы, тауы мен өзені тарихтан сыр шертеді. Әрбір жер атауының төркіні туралы талай-талай аңыздар мен әңгімелер бар. Әрбір өлкенің халқына суықта пана, ыстықта сая болған, есімдері ел есінде сақталған біртуар перзенттері бар. Осының бәрін жас ұрпақ біліп өсуге тиіс», – делінген.

Ұлт көшбасшысының осы сөзіне нақты іспен жауап беріп, қолға алы­нып отырған жалпы халықтық іске бір кісідей атсалысайық. Қорымды қоршау жұмысына алдағы кезде қаражат жинау мақсатында арнайы қор ашылады.

Жақсы іске жанашыр болайық, ағайын!

 Д. ХАНСҰЛТАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.