29 қаңтар күні Каспий теңізінің Ақтау қаласындағы жағалауында суға бата жаздаған әйел адам құтқарылды деп республикалық сайттар жарыса жазып жатты. Сол оқиғада қызды құтқарған сүңгуір-құтқарушымен mangystaumedia.kz сайты хабарласты.
Нағыз құтқарушы болу үшін арман мен ынта жеткіліксіз. Мұндай қауіпті жұмыста кез келген адам қызмет ете алмайды. Олардың дене бітімі мен денсаулығына, батылдығы мен қарапайымдылығына ғана қызығуға болады. Ал, атқаратын жұмыстары кез-келген адам шыдай бермейтін төзімділікті қажет етеді.
Әлемдегі ең қауіпті 8 мамандықтың бірі – құтқарушы қызметі. Ең қауіпті әрі жауапты мамандықты таңдағандардың бірі – Маңғыстау облыстық төтенше жағдайлар департаментінің судан құтқару қызметінің маманы Ислам Байкулов. Құтқарушы мамандығын тек физикалық ғана емес, рухани жағынан да мықты адамдар ғана таңдайтынын Исламға қарап айтуға болады. Ол негізгі қызметін Атырау қаласындағы ішкі істер департаментінде кинолог болып бастаған.
- Отбасылық жағдайға байланысты осы саладан уақытша кетіп қалған кезім болды. 2018 жылы жарым дүние салған соң, екі баланың барлық жауапкершілігі өзіме жүктелді. Екі бала кішкентай болған соң қарайтын адам болмады, амалсыз жұмыстан шығуыма тура келді. Алайда уақыт өте келе, 2021 жылы осы салаға қайта оралдым. Қажетті нормативтерді тапсырып, суға құтқару қызметі бойынша оқу оқыдым. Айта кетерлігі, басқа жұмыстарда жүргенде, өзім қаламаған нәрсені жасап жүргенімді түсіндім. Біреулерге темірдей тәртіп көрінгенімен, біз сол тәртіп, сол режимге үйренгендіктен, жүрек осы саланы қалағандықтан - ол бізге қалыпты жағдай, осы жұмыссыз өзімізді, өмірді елестету қиын. Себебі, үнемі қимыл-қозғалыс үстіндесің. Қауырт, беймәлім оқиғалар арқылы өзіңді жеңіп, шыңдап отырасың, қамығуға уақыт жоқ, - дейді ол.
Әркімнің өмірінде жеке қиындықтар болады, ондай ауыртпалық пен сынақтан төтенше жағдай қызметкерлері де кенде емес. Жеке қиындықтарды жеке өмірімнің мәселесі, ал қызмет - ол менің борышым деген біздің кейіпкеріміз өзгелерге бағыт-бағдар болса екен дейміз.
Биыл қыста Каспийдің бетіне мұз қатқаны белгілі. Ал, 29 қаңтар күні Каспий теңізінің Ақтау қаласындағы жағалауында суға бата жаздаған әйел адам құтқарылды, деп республикалық сайттар жарыса жазып жатты. Сол оқиғада қызды құтқарған сүңгуір-құтқарушы – ол Ислам Байкулов.
-Сол күні хабарлама келді. Одан соң артынан, адамның теңізге секіргені жайлы тағы бір хабарлама келді. Біздің міндет – оқыс оқиғаның алдын алып, құтқарылған адамды медицина қызметкерлеріне тапсыру. Адамдардың алғысын естіген де жақсы, бірақ ең бастысы сол жолы адамды құтқарып қалуға үлгердік. Басты мақсат - сол еді, – дейді ол.