Маңғыстаулық оқушылар Президенттік олимпиададан жүлделі орын алды

Ақтаудағы Назарбаев зияткерлік мектебінің оқушысы Аружан Ибрагим мен Мұнайлы ауданындағы №6 мектептің оқушысы Қарақат Сағыныш жаратылыстану-математикалық бағыттағы пәндер бойынша Қарағандыда өткен Президенттік олимпиаданың республикалық кезеңінен ІІІ орын алды, деп хабарлайды mangystaumedia.kz Қоғамдық коммуникация орталығына сілтеме жасап.

Қарақат Сағыныш 11-сынып оқушысы. Мұнайлы ауданындағы №6 мектепте білім алады. Президенттік олимпиадаға 10 сыныптан бастап дайындалған. Жеңіске қол жеткізу үшін барын салған. Айтуынша, олимпиадада математика, химия, биология пәндерінен тапсырмаларды орындау қиынға соқпаған.

-Физика пәні ең күрделі пән болды. Олимпиадада математика пәнінен алған баллмен басымдық бере отырып 3-орын алдым. Математика пәнінен кезең қорытындысы бойынша 7 балл, аппеляция нәтижесінде 10 балл алдым. Олимпиада да жақсы нәтижеге жету ұзақ уақыттық дайындықтың нәтижесі деп ойлаймын. Әрине, оңай болды деп айта алмаймын. Себебі, мұның артында үлкен еңбек пен ізденіс жатыр. Осы тұста өзімнің ұстаздарма алғысымды білдіргім келеді, дейді Қарақат Сағыныш.

Қарақат Сағынышты Президенттік олимпиадаға дайындаған жетекшілері Абай Актилевов, Пердегул Аймағанбетова, Амангүл Оразалиева мен Ақзада Тлегенова.

Ал Аружан Ибрагим – Ақтаудағы Назарбаев зияткерлік мектебінің 12 сынып оқушысы. Олимпиададағы сұрақтар мен есептер нағыз олимпиадалық тапсырмалар болды деп санайды. Оқушы осы жарыстармен тоқтап қалмай, халықаралық олимпиадаларға да қатысқысы келеді.

-Олимпиада жоғары деңгейде өтті. Сұрақтары мен есептері қиын болды. Осы жеңісімнен кейін болашақта тағы да жарыстарға қатысуға шабытанып тұрмын. Өте қуаныштымын. Мені дайындаған жетекшілеріме мың алғыс. Олардың көмегі арқылы ғана осындай жетістікке жетіп отырмын, - дейді 12 сынып оқушысы Аружан Ибрагим.

Аружанды олимпиадаға дайындаған жетекшілері Ақтау қаласындағы Назарбаев Зияткерлік мектебінің ұстаздары Светлана Озған, Анжела Галустян, Гүлжан Нүсіпжанова мен Лизавета Хамитова. Айта кетейік, Президенттік олимпиаданың республикалық кезеңіне 192 оқушы қатысты. Жеңімпаздар Қазақстан-Британ техникалық университеті және Қ. Жұбанов атындағы Ақтөбе өңірлік университеті сияқты университеттерге оқуға грант алады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.