Мемлекет басшысы бокстан әлем чемпионатының жүлдегерлерін қабылдады. Олардың арасында спортшылардың бапкерлері де бар, деп хабарлайды mangystaumedia.kz облыстық дене шынықтыру және спорт басқармасының баспасөз қызметіне сілтеме жасап.
Ұлттық құраманың аға бапкері, ҚР еңбек сіңірген жаттықтырушысы маңғыстаулық Марат Жақиевті мемлекет басшысы марапаттады.
Президент Қасым-Жомарт Тоқаев бокстан Өзбекстанның Ташкент қаласында өткен әлем чемпионатының жеңімпаздары Санжар Тәшкенбай, Махмұд Сабырхан, Асланбек Шымбергенов, Нұрбек Оралбай және күміс медаль иегері Дулат Бекбауовты, сондай-ақ бокстан Қазақстан ұлттық құрамасының мүшелері мен бокстан ерлер ұлттық құрамасының бас бапкері Мырзағали Айтжанов және құраманың аға бапкері Марат Жақиевті қабылдады.
Мемлекет басшысы спортшылар мен бапкерлерді әлем чемпионатындағы жарқын жеңісімен шын жүректен құттықтап, бұл күллі еліміз үшін айтулы оқиға екенін атап өтті.
Марат Жақиев ҚР Еңбек сіңірген жаттықтырушысы. 2005 жылы «Қазақстан Республикасының еңбек сіңірген жаттықтырушысы» атанса, 2006 жылы «Қазақстан Республикасының құрметті спорт қайраткері», 2012-2016 жылдары «Құрмет» ордені және «Парасат» ордендерін иеленді.
2019 жылы «ҚР жылдың үздік жаттықтырушысы», 2020 жылы Қазақстан Республикасы Мәдениет және спорт министрінің алғыс хатымен марапатталған.
Марат Исағалиұлының шәкірттері Олимпиада ойындарында және Әлем чемпионатында еліміздің туын көкке бірнеше рет желбіретті.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
