Маңғыстауда жыл басынан бері 17 адам тамақтан уланған

Маңғыстау облысында жыл басынан бері тамақ өнімдерінен уланудан 17 адам зардап шеккен, деп хабарлайды mangystaumedia.kz Қоғамдық коммуникация орталығына сілтеме беріп.

Бұл жайлы брифингте Маңғыстау облыстық санитариялық-эпидемиологиялық бақылау департаменті басшысының орынбасары Асылбек Шаров мәлімдеді.

Спикердің айтуынша, Ақтаудағы қонақүй мейрамханаларының бірінде ұйымдастырылған ауызашарда уланғандардың жағдайы бүгінде бірқалыпты,ауруханада тиісті ем-дом алған. Орын алған оқыс жайттан соң 21 мейрамхана қызметкері тексерістен өтіп, талдау нәтижесінде 7 адамның ағзасынан стафилокок табылған. Сонымен қатар, тексеріс барысында 20 қызметкердің медициналық кітапшасы жалған болғандықтан, ал 4-еуінің медициналық кітапшалары берілмегендіктен, 24 қызметкер жұмыстан шеттетілген.

-Тексеріс барысында мейрамхана тағамдарының арасынан жарамдылық мерзімі өткен 220 келі көлемінде өнімнің 73 түрі анықталып, комиссиямен жойылды. Жоспардан тыс санитарлық-эпидемиологиялық тексеру жұмыстарының нәтижесінде анықталған өрескел санитарлық талаптардың бұзушылығына жол бергені және адам денсаулығына зиян келтіруіне әкеп соққан әрекеті үшін мейрамхана басышылығына қатысты «Әкімшілік құқық бұзушылық туралы» Кодексінің 425-бабының 2-бөліміне сәйкес, қылмыстық жазаланатын іс-әрекет белгілерін анықтау мақсатында Ақтау қаласының полиция басқармасына хат жолданды, - деді Асылбек Шаров.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.