Маңғыстауда көлігі қарға батып, өзі жоғалып кеткен адам табылды

Маңғыстау облысының Жетібай-Жаңаөзен бағытының 66 шақырымында автокөлігі қарға батып, өзі жоғалып кеткен көлік иесі табылған, деп хабарлайды mangystaumedia.kz сайты.

18 ақпан күні, сағат таңертеңгі 08:25 шамасында «Тасболат Ойл Корпорэйшн» ЖШС мекемесінен солтүстік-батысы бағытында 1 ер азаматтың автокөлігі қарға батып қалып, өзі белгісіз бағытқа қарай жүріп, жоғалып кеткен.

Төтенше жағдайлар департаментінің авариялық құтқару қызметкерлері іздестіру жұмыстары барысында түскі сағат 12:30-да көліктен 14 шақырым жерге ұзап кеткен С есімді азаматты тапты. Азамат 1964 жылы туған. Көлік иесі оқиғадан соң аман-сау өз үйіне оралған.

Маңғыстау облысы ТЖД Өрт сөндіру және авариялық-құтқару жұмыстары қызметі баспасөзінің хабарлауынша, өткен аптада Маңғыстау облысында 8 көліктің қарға бату оқиғасы тіркелген.

Нақтырақ айта кетсек, 17 ақпан күні Жаңаөзен-Жетібай тас жолы бойында «TоyotaEstima» маркалы автокөлігі қарға батып, құтқарушылардың көмегімен қауіпсіз жерге сүйреп шығарылған.

Авариялық құтқару қызметкерлері дәл сол күні Жетібай-Ақтау тас жолы бағытындағы «Газель» және Құланды ауылы маңында қарға батып қалған «TоyotaНilux» маркалы автокөліктеріне жәрдем көрсеткен.

Ақтау қаласындағы «Tree of life» демалыс орнынан 7-8 шақырым жерде «ToyotaTacoma» маркалы автокөлігі сорға батып қалған. Құтқарушылар қызметі автокөлікті тросспен тарту арқылы қауіпсіз жерге шығарған. Көлікте 2 адам болған.

Ал 18 ақпан күні Жаңаөзен қаласындағы Мерей шағынауданының 76 көшесінде қарға батып қалған Жедел-жәрдем және «Газель» маркалы автокөліктеріне құтқарушылар қызметі көмек көрсеткен.

Жетібай-Жаңаөзен тас жолының 35 шақырымында қарға батып қалған «TоyotaHilux» маркалы автокөлігіне құтқарушылар қызметі көмек көрсетіп, көлікті қар құрсауынан шығарған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.