Құланды ауылында мәдени-демалыс орталығы ашылды

Қарақия ауданының 50 жылдығына орай Құланды ауылында мәдени ‐ демалыс орталығы ашылып, ел игілігіне берілді, деп хабарлайды mangystaumedia.kz сайты аудан әкімдігінің баспасөз қызметіне сілтеме жасап.

Ауыл тұрғындарын мәдени, спорттық және басқа да рухани жағынан қолдауға, дамытуға арналған кешенді орталықтың салтанатты ашылу рәсіміне Қарақия ауданының әкімі Сымбат Төретаев, орынбасары Санат Төкенов, аудандық мәслихат хатшысы Жанғабыл Қалаубай, "Amanat" партиясы аудандық филиалының төрағасы Қилымғали Көшенов, ауыл әкімі мен ардагерлері және тұрғындар қатысты.

Орталықтың лентасын ауданның құрметті азаматтары Теңел Төкенов, Ұйқасбай Сайлаубаев қатарлы ауыл ардагерлері қиды.

- Мемлекет Басшысы Қасым-Жомарт Тоқаев халыққа Жолдауында ауыл тұрғындарының тұрмысын жақсарту, жастарға рухани қолдау орындарын көбірек ашып, халықты бұқаралық спортпен кеңінен қамту мәселелерін тапсырған еді. Бүгін міне, аядай ауылда осындай ауқымды орталықтың ашылғаны – мемлекет саясатының ел ішінде жүзеге асып жатқанының айқын бір көрінісі, деуге болады,- деді аудан басшысы С. Төретаев.

Мәдени-демалыс орталығында тек мәдениет үйі ғана емес, кітапхана жүйесі, спорттық жаттығу залы, би үйірмесі және ардагерлерге арналған демалыс бөлмесі бар.

- Мәдениет – елдің мәйегі, спорт – денсаулық кепілі болса, кітапхана – білім көгжиегі. Ендеше бұл орталық ауыл тұрғындарына рухани қызмет көрсетіп, жастарымызды өнерге, білімге, спортқа баулып, салт-дәстүрімізді, елдігімізді жан-жақты дәріптейтін үлкен рухани шаңыраққа айналғай. Ордадан Ақмарал Ерімбетова сынды дарынды жастар шыға берсін!" - деп қосты аудан әкімі.

Айта кетейік, орталық "Amanat" партиясының сайлауалды бағдарламасына сәйкес
«Ауыл – Ел Бесігі» жобасы аясында қаржыландырылып, жүзеге асты. Мердігер мекеме – «Нұр-Жол Құрылыс» ЖШС. Келісім шарт құны - 466,299 млн тг. Қаражаты толықтай игеріліп, нысан ел игілігіне берілді.

Ғимараттың жалпы ауданы – 1047 ш.м. Құрылыс нысанында 164 орындықты мәдинет үйі, көрермен залы, кітапхана мұражай, ақсақалдар, сурет кабинеті, оқу сыныбы, домбырашылар бөлмесі, актерлік шеберлігін шыңдау үйірмесі және би залы секілді бөлмелер бар.

Сондай-ақ астынғы қабатында аула клубы, жаттығу залы, акт залы, шаруашылық қоймалары орналасқан. Жаттығу залдары дене шынықтыру, қимыл-тірек органдарын дамытуға арналған арнайы жаттығу құралдарымен толық қамтылған.
Мәдени-демалыс кешені 12 адамды тұрақты жұмыспен қамтиды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.