Ақтауда қонақтар Наурыз мерекесімен құттықтады

Ырыс пен ынтымақтың, береке мен бірліктің жаршысына айналған Ұлыстың ұлы күні­ – Наурыз мейрамын маңғыстаулықтар тойлауды бастады. Жыл сайын ұйымдастырылатын «Әз-Наурыз» мерекесі биыл да ерекше сән-салтанатымен Наурыз тойының шымылдығын ашты, деп хабарлайды mangystaumedia.kz.

Мереке аясында барлық мекеме қызметкерлері салт-дәстүрлерімізді жаңғырту мақсатында қазақы болмысымызды танытатын ұлттық киімдерімізді киіп, шара қонақтарына ұлттық тағам, сусындарымызды ұсынып, мерекені одан әрі жандандырып жатыр. Сондай-ақ, мерекеде жастардың қатысуымен ұлттық ойын түрлерінен сайыстар өткізіліп жатыр.

Мерекеге орай Форт - Шевченко қаласынан арнайы келген Таңсұлу Зербекбаева өзінің жылы лебізімен бөлісті.

- Көпшілік қауым Ораза қабыл болсын. Наурыз мерекесі құтты болсын. Той тойға жалғаса берсін. Жыл жақсылығын берсін, - деді қала қонағы.

Ағайынмен көрісіп, мерекеде көңіл босатысып жатқанда бата беру шараның ең негізі сәттерінің бірі. Осы орайда ақсақалдарымыз ақ батасымен бөлісіп, ақ жаулықты әжелеріміз шашуларын шашып, әдемі көңіл - күймен мерекені қарсы алып жатыр.

- Жаңа жыл жақсылығымен келсін,
Ақ мол, береке мол болсын.
Денсаулықтарың мықты болсын
Өмірлеріңіз мәнді де, сәнді бола берсін! - деді шараға келген Балабатыров Тілектес.

Мереке қарсаңындағы әуезді ән мен ұйымдастырылған түрлі көрмелер халыққа ерекше мерекелік әсер сыйлауда. Осыған орай шара қонағы өз әсерімен бөлісті.

- Наурыз құтты болсын. Мерекелік көңіл - күй өте жоғары. Барлығы жоғарғы деңгейде ұйымдастырылған. Ұлттық тағамдарымыздан ауыз тиіп, түрлі көрмелердің куәгері болдық. Мереке жалғасын таба берсін! - деді қала тұрғыны.

Жақсылық пен ізгіліктің бастауы болған Наурыз мейрамы барша қазақстандықтардың өміріне жаңа тыныс әкеліп, шуақты нұрына бөлегей. Еліміз аман, жұртымыз тыныш болсын!

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.