Теңіз жаяу әскерлері судағы кедергілерді еңсеруде

Каспийде өтіп жатқан жауынгерлік даярлық сабақтары шеңберінде теңіз жаяу әскерлері құрамасының механик-жүргізушілері жүзу кезінде бронды транспортерлерді басқару жаттығуларын өткізіп жатыр, - деп хабарлайды mangystaumedia.kz сайты Ақтау гарнизонының баспасөз қызметіне сілтеме жасап.

Жабдықталған оқу орындарына жүзіп бармас бұрын, су кедергілерін еңсеру кезінде қауіпсіздік техникасынан теориялық сабақтар өткізілді. Сондай-ақ нұсқаушылар механик-жүргізушілерге жауынгерлік техниканы дайындау және тексеру тәртібін, оны бітеу шараларын, құтқару-көшіру қызметін және байланысты ұйымдастыру іс-қимылдарын түсіндірді.

– Әскери қызметшілер жаттықтыру кешендерінде практикалық іс-қимылды пысықтап, арнайы алаңдарда нормативтерді орындады. Содан кейін ғана жауынгерлер БТР-82А бронды транспортерлерінде жүзуге жіберілді, – деді бригада командирінің қару-жарақ жөніндегі орынбасары гвардия подполковнигі Аслан Нұржанов.

Қазіргі уақытта теңізшілер су кедергілерін еңсеретін техникамен жұмыс істеуде. Жауынгерлік машиналарда жүзу жағалау сызығы бойымен жағадан 50 метр қашықтықта өтеді. Су жолының ұзақтығы – 500 метр. Жаттығу өтетін судың тереңдігі екі метрден асады. Күрделі жағдайда тапсырмаларды орындау кезіндегі экипаждардың үйлесімді іс-қимылдары да ерекше назарда болады.

Су кедергілерін еңсеру маневрлеріне 100-ден астам әскери қызметші, 20-дан астам жауынгерлік және арнайы техника жұмылдырылды. Сабақтардың қауіпсіз жағдайда өтуін жауынгерлік жүзгіштер командасы, жылдам жүретін катер және арнайы көшіру техникасы қамтамасыз етеді. Жаттығу сабақтары 19 тамызға дейін жалғасады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.