Ақтаудағы тұрақтандыру қорында қант жеткілікті ме

«Каспий» әлеуметтік-кәсіпкерлік корпорациясының әлеуметтік маңызы бар азық-түлік тауарларының тұрақтандыру қорында 195 тонна шекер бар. Маусымда 70 кәсіпкер тұрақтандыру қорынан 132 тонна қант алған, - деп хабарлайды mangystaumedia.kz сайты «Каспий» ӘКК баспасөз қызметіне сілтеме жасап.

Қазір қант шағын кәсіпкерлерден бөлек, «Дина», «Анвар», «Идеал Маркет» секілді ірі сауда желілеріне сатылып жатыр. «Каспий» ӘКК-нің тұрақтандыру қоры тәтті түйіршіктерді "Азық-түлік келісім-шарт корпорациясы" ҰК" АҚ-дан тасымалдап келді. Енді әлеуметтік-кәсіпкерлік корпорация қантты Жамбыл облысынан да жеткізе бастады.

«Біз осыған дейін қантты Астраханьнан тасымалдайтын кәсіпкерден сатып алып отырдық. Соңғы шектеулерге байланысты олар жұмысын тоқтатты. Қазір «Каспий» әлеуметтік-кәсіпкерлік корпорациясы арқылы қолжетімді бағада ала бастадық. Осы қоймадан қант алуға үшінші рет келіп тұрмын. Қазір 2 тонна қант алып бара жатырмын. Бұл бізге 1 айға жетеді деп жобалап отырмыз», - деді кәсіпкер Мейірбек Мекеев.

«Каспий» ӘКК баспасөз қызметінің айтуынша, әлеуметтік маңызы бар азық-түліктердің тұрақтандыру қорында қант мөлшері жеткілікті. Қордағы қант қала мен аудандардағы кәсіпкерлік бөлімінің сұраныс хатына сай жеке кәсіпкерлерге сатылады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.