Маңғыстау облысында 2025 жылға дейін 16 мәдениет нысаны бой көтеріп, 70 нысанға жөндеу жұмыстары жүргізілмек. Бұл туралы қоғамдық коммуникация орталығында өткен брифингіде Маңғыстау облысы мәдениет, архивтер және құжаттама басқармасы басшысының орынбасары Гүлзайда Төлеуғалиева мәлімдеді.
Спикер алдағы уақытта өңірде бой көтеретін мәдени нысандарға тоқталды.
- Маңғыстау облысының кешенді әлеуметтік-экономикалық даму жоспары аясында 2025 жылға дейін 16 мәдениет объектісін, оның ішінде 7 ауылдық клуб, 6 кітапхана, 2 музей, 1 театр салу жоспарланған және 70 мәдениет объектісіне жөндеу жұмыстарын жүргізу жоспарланған. Былтырғы жылы 3 – кітапхана (облыстық, Жармыш, Басқұдық) мен 2 - мәдениет үйінің ғимараттары салынып пайдалануға берілсе, 2022 жылы «Ауыл-ел бесігі» бағдарламасы бойынша республикалық бюджеттен Түпқараған ауданындағы С.Шапағатов ауылдық кітапханасы мен мәдениет үйі Қарақия ауданынан музей ғимараты және жергілікті бюджет арқылы Жаңаөзен қаласының музей ғимаратын салу жоспарға қойылған, деді Гүлзайда Төлеуғалиева.
Спикердің айтуынша, өңірде мемлекеттік қорғауда 590 ескерткіш бар. 2021 жылы жүргізілген дала іссапарлары нәтижесінде 9 тарихи-мәдени мұра объекті анықталып, алғашқы есепке алу жұмыстары жүргізілді.
- Олар: Бейнеу ауданына қарасты Манашы үйігі, Серікбай, Серікбай 2 (Мажақай) қорымдары, Қарақия ауданы бойынша Сорбұлақ 2, Аққуыс, Аққуыс 2 қорымдары. Сондай-ақ, Маңғыстау ауданындағы Есет ата жерасты мешіті, Мұнайлы ауданы аймағындағы «Песчаний» Маягі және Түпқараған ауданы аймағындағы «Қызылөзен» Маягі тарихи-мәдени мұра объектісі бойынша фотофиксация жұмыстары жүргізілді, құжаттары жасақталды,-деді Гүлзайда Төлеуғалиева.
Сонымен бірге, Маңғыстау ауданында орналасқан «Қызылқала ортағасырлық қалашығы» ескерткішініне археологиялық жұмыстар жүргізілді. Биылғы жылы Маңғыстау ауданына қарасты «Қарауылкүмбет» мавзолейіне, Түпқараған ауданына қарасты «Жоғарғы маяк», «Төменгі маяк», «Шіркеу» тарих және мәдениет ескерткіштеріне реставрация жасалмақ.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
