«Қошқар ата»: Биыл 800 гектар жер рекультивацияланады

Биыл «Қошқар ата» қалдық қоймасын рекультивациялауға 3 млрд теңге қаралды. Бұл туралы Мәжіліс депутаты Еділ Жаңбыршин Маңғыстауға іс сапары барысында айтты, - деп хабарлайды mangystaumedia.kz сайты.

Бүгіннен бастап қалдық қоймасын қалыпқа келтіру жұмыстары басталып кетті.

Мердігер мекеме басшылығының айтуынша, қазір 70-ке жуық адам, 30-дан аса техника жұмыс істеп жатыр.

Яғни, мамандар жергілікті топырақты кеуіп қалған қалдық қоймасына төгіп, оны 30 см қалыңдықта жаяды. Кейін су сеуіп, топырақты тығыздайды. Аталған жұмыс орындалғаннан кейін сексеуіл отырғызады.

Сонымен қатар мердігер мекеме биыл 800-900 гектар жерді рекультациялауға мүмкіндігі бар екенін айтты.

Осы ретте Мәжіліс депутаты Еділ Жаңбыршин бюджет нақтыланған соң тағы қосымша қаржы бөлуді қарастыратынын алға тартты.

«Себебі мына жұмысты ерте бітіруіміз қажет. «Қошқар ата» қалдық қоймасы маңында 400 мыңдай халық отыр. Ақтау қаласы, Ақщұқыр, Сайын, Мұнайлы ауданы түгел осы жерде орналасқан. Қазіргі таңда қалдық қоймасының солтүстік батыс бетінен рекультивация жұмыстары басталған. Сол арқылы «Қошқар атаға» қарай топырақты итеріп келе жатыр. Бұрын кейбір жерлер локальді түрде рекультивациядан өткен болатын. Екі түрлі нұсқамен жасаған, яғни қауіпті радиациялық аймақты бетондаса, екіншісі топырақ арқылы көмген. Бұл орындар әлі күнге дейін жатыр», - дейді Еділ Жаңбыршин.

Айта кетейік, 2024 жылға дейін «Қошқар ата» қалдық қоймасының 45 шаршы километр аумағы рекультивациядан өтеді.

Ал былтыр жыл соңында 1 млрд теңге қайта бөлінген болатын. Бұл қаржы толық игерілді. Тиісті мамандардың айтуынша, былтыр 266 гектар жерге топырақ төселді.

Жұлдызай ҚАЛИЕВА

Суретті түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.