Маңғыстауда 48 мыңға жуық оқушы онлайн оқып жатыр

Бүгін мектеп оқушылары оқу жылының 3-тоқсанын бастады. Карантиндік талаптарға сәйкес 47 799 оқушы онлайн, 119 091 оқушы штаттық режимде білім алып жатыр, - деп хабарлайды mangystaumedia.kz сайты.

«Аймақта 171 мектеп 167 500 оқушымен үшінші тоқсанды бастады. Облыс, аудан орталықтарының 600 оқушыға дейінгі білім беру ұйымдары – оқытудың штаттық режимі, 600-ден астам оқушысы бар мектептер – қашықтан оқыту форматы, ауыл мектептері – штаттық форматта, 1-2-сыныптар – оқытудың штаттық форматы және 3-5-сыныптар кезекші сынып режимінде оқиды», - дейді облыстық білім басқармасының басшысы Светлана Төлебаева.

Оның айтуынша, 5 аудандағы мектептер және Ақтау қаласындағы Өмірзақ елді мекеніндегі, Жаңаөзен қаласында Рахат, Теңге, Қызылсай ауылындағы мектептер санитарлық талаптарды сақтап, штаттық режимде жұмыстарын жалғастырып жатыр.

Қалалық жердегі оқушылар үшін интернет қолжетімді. Ал 3 100 оқушы роутермен қамтамасыз етілген. Сонымен қатар аз қамтылған көп балалы отбасылар арасынан компьютерге мұқтаж 2 881 оқушыға қажетті техникалық жабдық уақытша берілді. Осы ретте өңірдің бас ұстазы онлайн оқуға мүмкіндігі жоқ оқушылар мектептен компьютер ала алатынын ескертті.

Мектептерде санитарлық құрал-жабдықтар жеткілікті және сынып бөлмелері тазартылып тұратынын атап өтті.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.