Бейнеу ауданының тұрғыны Қайнарбай Байбатыров өз ауласын жасыл желекке айналдырып, табиғи өнім тұтынып отыр, - деп хабарлайды mangystaumedia.kz сайты.
Бейнеу баспасөз қызметінің айтуынша, Қайнарбай Байбатыровтың ауласында қазір 50 түп алма, 70 түп алмұрт, 30 түп өрік, 40 түп шабдалы ағашы бар. Сондай-ақ анар, жүзім, құлпынай, қарақат, айва, грек жаңғағын да отырғызған. Жыл сайын жеміс алып отырған ол ағаш өсірудің қыр-сырымен бөлісті. Ешқандай химиялық қоспасыз өсетін өнімдердің дәмі басқа аймақтардың, елдердің өнімдерінен кем еместігін айтады. Қайнарбай осы іспен 10 жылдан бері айналысып келе жатыр. Сол уақыт аралығында ол әр ағашқа әртүрлі күтім қажет екенін түсінген.
«Маңғыстауда ештеңе өспейді екен дегендер келіп көрсін. Үкімет әр отбасыға жер беріп отыр. Соны дұрыс пайдалана білген жөн. Өзіміздің, бала-шағамыздың денсаулығы үшін табиғи өнімдерді жеу керек. Жеріміз бар, күн бар, су келіп тұр, тұқымдар бар, тек сәл ғана еңбектенсе жетіп жатыр», - дейді Қ. Байбатыров.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
