Ақтау гарнизонында әскери ардагерлерге құрмет көрсетілді

«Қазақстан Республикасы Қарулы Күштерінің ардагерлері» республикалық қоғамдық бірлестігінің құрылғанына 10 жыл толуына орай Ақтау гарнизонында салтанатты шара өтті, деп хабарлайды mangystaumedia.kz.

Қорғаныс істері жөніндегі департаменттің ұйымдастыруымен өткен басқосуға арнайы қонақтар шақыртылды. Құрметті меймандардың қатарында Қарулы Күштердің ардагерлері Марат Төлекбаев, Ғалым Андалиев және Айнұр Юсупова болды.

- Қазақстан Республикасы Қарулы Күштерінің дамуына үлес қосқан ардагерлерге құрмет көрсету – біздің міндетіміз. Бұл кісілердің әскери салаға қосқан еңбегі зор, өмір жолы жастарға үлгі. Бүгін міне,Қазақстан Республикасының Қорғаныс министрі мен Қорғаныс министрінің бірінші орынбасары – ҚР ҚК Бас штабы бастығының атынан алғыс хат пен грамоталар салтанатты түрде табыс етілді, - деді Маңғыстау облысының Қорғаныс істері жөніндегі департаментінің бастығы полковник Мақсат Тастанов.

Әр әскери қызметші қатардағы жауынгерден бастап, бүкіл әскери өмір мектебін аяқтаған соң запасқа шығып, азаматтық өмірге оралу үшін жергілікті әскери басқару органдарына келеді. Жергілікті әскери басқару органдары адамдарды әскери өмірмен байланыстырушы мекеме. Қазақстан Республикасы Қарулы Күштерінің ардагерлері зейнетке шықса да, Тәуелсіз Қазақстан Қарулы Күштерінің дамуы мен нығаюына өз үлестерін қосуды тоқтатқан емес.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.