Теңіз жаяу әскерлерінің бригадасы мамандарды оқытуға кірісті

Ақтау гарнизонындағы гвардиялық бригаданың 1000-нан аса әскери қызметшісі жаңа мамандықтарды меңгере бастады, деп хабарлайды mangystaumedia.kz.

Сабақ өткізу үшін барлығы 200-ге жуық нұсқаушы бөлінген. Дәрістер 7-ші маусымда басталып, 2 шілдеге дейін жалғасады.

Оқудың мақсаты – әскери қызметшілерді мамандықтары бойынша қажетті дағдылар мен машықтарға үйрету, кәсіби білімдерін жетілдіру. Сондай-ақ, жеке және топтық қаруды, қару-жарақ пен әскери техниканы шебер және тиімді қолдануға үйретіп, тәжірибелік сабақ кезінде мамандардың далалық дайындық деңгейін арттыру.

Жалпы сабақтарға 100 оқу сағаты бөлінген, аптасына 5 рет өткізіледі.

Сабақта оқу-әдістемелік материалдар мен арнайы фильмдер көрсетіледі. Оқытушылар қарудың және техниканың материалдық бөлігін үйретеді.

– Оқу кезеңінде әскерге жаңа келгендер ант қабылдады және оларға қару-жарақ пен әскери техника бекітілді. Енді, жеке құрам мамандық бойынша даярлықтан өтеді. Оларға білікті мамандар, сержанттар мен офицерлер, яғни нұсқаушылар дәріс оқып, білгенімен бөлісуде, – деді батарея сержанты гвардия аға сержанты Ахмет Қадыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.