Ақтауда «TETYSBLU» жобасы аясында 98 гольф вилланың құрылысы жүріп жатыр. Тамыз айында гольф клуб пен 20 вилла пайдалануға беріледі, - деп хабарлайды mangystaumedia.kz сайты.
Ал қалған 68 вилланың құрылысын толық аяқтау жыл соңынa дейін жоспарланып отыр.
«Біз осы жоба жайлы көп ойландық. Содан кейін гольф вилланы гольф клубының айналасына салуды ұйғардық. Бұл – Қазақстан елінде қайталанбайтын бірегей жоба. Мұндағы мақсат – Ақтау қаласының атын шығарып, туризмнің дамуына үлес қосу. Қазір виллалар мен гольф клубтың құрылысы жүріп жатыр. Тамызда гольф клуб ашылады, оған қоса 20 вилла аяқталады», - дейді «TETYSBLU» жобасының жауапты менеджері Юнель Алтун.
Вилла ерекшеліктеріне байланысты 3-ке бөлінеді. Алғашқысы «3+1» деп аталады. Яғни бірқабатты вилланың аумағы – 300 шаршы метр. Онда 3 жатын бөлме, 1 қонақ бөлме болады. Ал екіқабатты вилланың түрі – «4+1», мұнда 4 жатын бөлме, 1 қонақ бөлме бар. Ал үшінші түрі «5+1» деп аталады, 5 жатын бөлме және 1 қонақ бөлмемен қамтылады.
Әрбір вилланың аумағында бассейні мен шағын бағы болады. Ал вилла терезесі гольф клубқа қарайды.
Аталған вилланың барлығы сатылымға қойылған. Мамандардың айтуынша, тұрғындар үш нұсқа бойынша вилланы сатып ала алады. Айта кетейік, жалпы «TETYSBLU» жобасының өзі 2022 жылы толық аяқталады.
Жұлдызай ҚАЛИЕВА
Суреттерді түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
