Биыл Ақтауда тематикалық парк ашылады

Шілде айында «TETYSBLU» туристік қалашығында салынып жатқан тематикалық парк ашылады. Бұл туралы аталған туристік қалашықтың атқарушы директоры Махмұт Жаримбетов мәлімдеді, - деп хабарлайды mangystaumedia.kz сайты.

Жалпы «TETYSBLU» туристік қалашығы Каспий теңізінің оңтүстік-шығыс жағажайында 130 га жерге салынып жатыр. Оның ішінде тематикалық парк, гольф клубы, виллалар мен сауда орталығы бар. Қазіргі таңда барлық нысанның құрылысы қарқынды жүріп жатыр.

«Өздеріңіз білесіздер, 2020 жылы бес жұлдызды Rixos Water World Aktau қонақ үйін іске қостық. Енді биыл екінші этап бойынша жұмыстар жүргізіліп жатыр. Яғни 15 га жерде тематикалық парк орналасады. Тематикалық парк ішінде 16 аттракцион болады. Бұл - елдегі ең үлкен тематикалық парк. Шілде айында ашуды жоспарлап отырмыз», - дейді Махмұт Жаримбетов.

Одан бөлек 40 га жерде гольф клуб салынып жатыр. Оның жанында 98 вилла болады. Аталған виллалардың жартысы жыл соңына дейін аяқталады. Сонымен қатар сауда орталығы мен екінші 5 жұлдызды қонақ үйдің құрылысын аяқтау да жыл соңына дейін жоспарланып отыр.

Жауапты мамандардың айтуынша, тематикалық парк қызметі халық үшін қолжетімді болмақ. Яғни, қала тұрғындары мен қонақтарының еркін қыдырып, демалуына барлық жағдай жасалады. Атап айтқанда, арнайы ресторан, фуд-корт, автотұрақ және басқа да қажеттілікке сай қызмет көрсетіледі. Сонымен қатар аллея арқылы демалушылар жаяу жүріп, велосипедпен немесе арнайы тематикалық паровозбен серуендей алады.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.