Бүгін «Жас батыр» спорт мектебінде самбошыларға арналған шеберлік сағаты өтті. Шараға әр өңірден келген 200-ден астам самбошы қатысты, - деп хабарлайды mangystaumedia.kz сайты.
Жас самбошылар КСРО спорт шебері, самбодан Азия және Әлем чемпионы Сергей Волобуев және самбодан 3 дүркін Азия чемпионы, Әлем чемпионатының 2 дүркін қола жүлдегері Бауыржан Сағынғалиұлынан сабақ алды. Аталған шеберлік сағаты ертең өтетін республикалық турнир аясында ұйымдастырылды.
Еске сала кетейік, ертең «Жас батыр» спорт мектебінде самбодан республикалық турнир басталады. Жарыста Нұр-сұлтан, Алматы, Ақтөбе, Атырау, Батыс Қазақстан, Жамбыл, Қызылорда, Түркістан, Маңғыстау облыстарынан және Шымкент, Байқоңыр қаласынан келген 500-ден аса спортшы бақ сынайды.
Екі күнге созылатын турнирде 2005-2006 жылы туған жасөспірімдер ұлдар -38, -42, -46, -49, -53, -58, -64, -71, -79, 88, +88 келі салмақ дәрежесінде, ал қыздар -47, -59 келі бойынша сынға түседі. Ал екінші күні 2008-2009 жылы туған ұлдар -30, -32, -35, -38, -42, -46, -49, -53, -58,-64, +64 келі салмақ бойынша күреседі. Қыздар -30, -36 келі салмақ бойынша белдеседі.
Жеңімпаздар арнайы кубок, дипломдармен марапатталады.
Жұлдызай ҚАЛИЕВА
Суреттер «Жас батыр» спорт мектебінен алынды
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
