«Қошқар Ата» қалдық қоймасы 3 жыл ішінде қалпына келеді. Аталған жұмысқа 15,5 млрд теңге қаржы жұмсалады. Бұл туралы Маңғыстау облысының табиғи ресурстар және табиғат пайдалануды реттеу басқармасының басшысы Дүйсен Құсбеков айтты, - деп хабарлайды mangystaumedia.kz сайты.
Бүгін ҚР Экология, геология және табиғи ресурстар министрі Мағзұм Мырзағалиев «Қошқар Ата» аймағына барды. Ол экологиялық аймақты қалыпқа келтіру жұмыстарымен танысты.
«2019 жылы 13 желтоқсан күні конкурс жарияланған болатын. Нәтижесінде «Павлодар өзен порты» АҚ-ы жеңімпаз атанды. Бір жыл ішінде мемлекеттік сатып алу конкурсын өткізудің заңдылығы бойынша сот процесстері болды. Биыл ҚР Жоғарғы соты кассациялық шағымдарды қанағаттандырды», - дейді Маңғыстау облысы әкімінің орынбасары Бақытжан Качаков.
Оның айтуынша, қалыпқа келтірудің 1 кезеңіне қаржының 90 %-ы республикалық, 10 % - ы жергілікті бюджеттен бөлініп отыр. Жұмыстар сәуір айында басталады.
Осы ретте ҚР Экология, геология және табиғи ресурстар министрі Мағзұм Мырзағалиев жергілікті мамандарға аталған жұмыстарды уақытылы аяқтауды тапсырды.
Айта кетейік, «Қошқар Ата» қалдық қоймасының айналасына 238 750 қара сексеуіл және жүзгін отырғызылды. 88,2 га жер жасыл желекке айналды.
Дүйсен Құсбековтың айтуынша, қазіргі таңда 2021-2023 жылдарға «Қошқар Ата» қалдық қоймасының айналасындағы 40 га аумаққа жасыл қорғаныс аймағын өсіруге конкурс жарияланып отыр. Осылайша ол экологиялық аймақтың ел қоныстанған жиектері жасыл қорғаныш белдеуімен толық қоршалып шыққанға дейін жұмыс жалғаса беретінін жеткізді.
Жұлдызай ҚАЛИЕВА
Суреттерді түсірген Серік МАЙЕМЕРОВ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
