Маңғыстауда мәслихат депутаттары алғаш рет біліктілігін арттыру бойынша оқып жатыр

Маңғыстау облысының әкімі Серікбай Трұмовтың ұсынысымен өңір бойынша барлық деңгейдегі мәслихат депутаттарының біліктілігін арттыру семинары басталды. Бұл туралы ҚР Президенті жанындағы мемлекеттік басқару академиясының Маңғыстау облысы бойынша филиал директоры Айгүл Демеуова мәлім етті.

«ҚР Мәслихат депутаттарының қызметтерін ұйымдастыру мен жүзеге асыру ерекшеліктері» тақырыбындағы семинардың басты мақсаты - депутаттық қызметтегі жеке тиімділікті арттырудың негізгі қағидаларын зерттеуге бағытталған. Депутаттың күнделікті қызметіндегі негізгі құқықтық және басқарушылық аспектілерін анықтауға, сондай-ақ депуттатың практикалық қызметіне көмектесетін жеке ресурстарды қалыптастыруға мүмкіндік беру», - деді ол.

Семинар жоспар бойынша 3 күн өтеді. 27 қаңтар мен 29 ақпанға дейінгі аралықта бекітілген кестеге сәйкес облыс, қала, аудан мәслихатынан сайланған 136 депутат қатысады.

«ҚР Президентінің жанындағы Мемлекеттік басқару академиясының Маңғыстау облысы бойынша филиалында жаңа құрамдағы депутаттарға семинар өткізеді. Нормативтік құқықтық актілер, депутаттық стреске төзімділік, депутаттық этика, депутаттық сауалды қалай беру керек оның ішкі алгоритмі секілді бірнеше тақырыптар қамтылады»,-деді Айгүл Демеуова.

Семинарда экономика ғылымдарының докторы, облыс әкімінің кеңесшісі мен ҚР Президентінің жанындағы мемлекеттік басқару академиясының философия ғылымдарының докторлары мен профессорлары дәріс оқиды.

«Депутаттық қызметтің жан-жақты білімін, іскерлігі мен дағдыларын арттыру, депутат мәртебесі мәселесін қарастыру, жеке тиімділік пен басқарушылық ресурсты дамыту, менеджмент және психология саласындағы білімді жүйелеу, даулы жағдайларды шешуге практикалық тәжірибе жинақтайды. Семинар тақырыбына қызығушылық танытып, өзгермелі қоғамда кәсіби біліктіліктердің жүзеге асыруда бірден-бір қажетті шара болмақ», - деді А. Демеуова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.