Облыста дәрі-дәрмек қоры жеткілікті

Бұл туралы Маңғыстау облысының қоғамдық коммуникация орталығында өткен брифингте МО бойынша медициналық және фармацевтикалық бақылау департаменті басшысының орынбасары Нұрсұлу Мұхамбетярова мәлім етті.

Оның айтуынша өңірдегі 7 қоймада дәрі-дәрмектің қоры 2-3 айға жеткілікті. Ал, коронавирустық инфекцияны емдейтін дәрілердің бағасы 27% төмендетілді. Жалпы бұйрық 2021 жылдың 1 қаңтарынан бастап күшіне енді. Бұл өзгерістер коронавирусты инфекцияны емдеу үшін пайдаланылатын дәрілік препараттарға шекті бағаны қалыптастыруды көздейді.

"Үстеме бағаның белгілі бір деңгейі болады, оның үстіне қосымша бағаны қоюға, алыпсатарлықпен сатуға болмайды. Мәселен, бір дәріханада бір дәрінің бағасы басқа дәріханаға қарағанда әлдеқайда жоғары екенін көруге болады. Сондықтан, шектеу бағалар бекітілді. Басты міндет – бағаның ауытқуы тек белгіленген шеңберде ғана болуын қамтамасыз ету. Көтерме және бөлшек саудада, ТКМКК және МӘМС жүйесінде дәрілік заттардың саудалық атауларының шекті бағалары үстеме бағаның регрессивті шкаласына сәйкес қалыптастырылады", - деді Нұрсұлу Мұхамбетярова.

Сондай-ақ, Қазақстанда медициналық маскалардың бағасы мен ПТР тестілері екі есеге төмендеді. Онкологиялық препараттардың бағасы төмендей бастайды. Қазақстан Республикасында тіркелген дәрі дәрмектер, шекту бағалары туралы ақпаратты әрбір азамат «Dari kz» мобилді қосымша арқылы ала алады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.