Маңғыстауда коронавирус бойынша эпидемиологиялық жағдай тұрақты

Соңғы аптада Маңғыстау облысында 11 адам коронавирус инфекциясын жұқтырып, 7 тұрғын коронавирустық пневмонияға шалдыққаны белгілі болды. Бұл туралы өңірлік Қоғамдық коммуникация орталығында өткен брифингте облыстық санитариялық-эпидемиологиялық бақылау департаментінің басшысы Ғазиз Надуев мәлім етті.

Оның айтуынша, бүгінгі таңда Маңғыстау облысының аумағында коронавирус инфекциясы бойынша эпидемиологиялық жағдай қолайлы болып отыр. Атап айтсақ, соңғы аптада (20.11-27.11) Маңғыстау облысы репродуктивті көрсеткіш бойынша жасыл аймақта.

«Коронавирус инфекциясынан қайтыс болғандар - 74 науқас, емделіп шыққандар – 3329 (97,4%). Стационарда 6 науқас ем қабылдап жатса, шағымы жоқ 9 науқас үй карантинінде. Облыста барлығы коронавирустың шағымы бар түрін жұқтырған 1169 науқас тіркелді, оның ішінде Ақтау қаласы – 488, Жаңаөзен - 157, Түпқараған -40, Қарақия – 75, Маңғыстау – 42, Мұнайлы – 171, Бейнеу – 198 болды», - деді Ғазиз Надуев.

Айта кетейік, 11 қарашадағы жағдайға сәйкес, ПТР тәсілімен мемлекеттік және жеке меншік зертханаларда (барлығы - 5) 161587 (бір күнде 498 анализ) адам тексеріліп, оның 0 оң нәтиже берді. Ұлттық сараптама орталығында бүгінгі таңда 22770 тест сынамасы бар.

Облыста мемлекеттік тапсырысты орындап отырған Маңғыстау облыстық ұлттық сараптама орталығы, одан басқа короновирусқа зерттеу жүргізіп отырған жеке меншік зертханалар: «Эталон-Мед», «Invivo», «ОЛИМП», «Ча-Кур».

Облыста 17 тамыздан бастап 24 мониторинг тобы құрылды. Бүгінгі таңда мониторинг тобымен 808 рейд жүргізіліп, 2202 нысан тексерілді. Рейд барысында 141 нысанда бұзушылықтар анықталып, 113 ( 16 жеке кәсіпкер, 96 жеке тұлға, 1 заңды тұлға) әкімшілік хаттама (9 млн. 431310 тг.) толтырылды.

6-қазаннан бастап, Өзбекстанмен шекаралас жатқан «Тажен» автомобиль өткізу пункті арқылы 9180 автокөлік және жаяу жолаушылар кірді. Оның ішінде: Транзиттік автокөлік 8662, Қазақстан Республикасына 216 автокөлік, 159 жолаушы (39 жолаушы ПТР анализсіз, ал 120 жолаушы ПТР анализімен), 4 транзиттік жолаушы өтті. Тексерілген 34 азаматтың ішінен 2 оң нәтиже анықталды. Екеуінде де вирустың шағымсыз түрі болғандықтан, олар үй карантиніне алынды.

«Ақтау халықаралық әуежайы арқылы шет елдерден 1505 жолаушы ұшып келді. Оның ішінде 132 жолаушыда ПТР анализі болмауына байланысты, олар оқшауға алынып, коронавирусқа тексерілді. Қорытындылары теріс», - деді Ғазиз Надуев.

Баспасөз конференциясына Ақтау қалалық №2 емханасының директоры Жарас Байғожаев қатысты. Оның мәліметінше, медициналық мекемеге 80 283 тұрғын тіркелген. Пандемияға байланысты, тиісті шаралар қолға алынды. Емханада балаларға, жүкті әйелдерге, ересектерге арналған бөлек фильтрлер 08:00-ден 17:00-ге дейін апта бойы үзіліссіз жұмыс істейді.

«Емханамызға келушілер ғимаратқа кірмей тұрып әуелі дене қызуын өлшетеді. Егер ол адамнан тұмау, ЖРВИ, суық тиюдің белгілері байқалса ол бірден фильтрге кіреді. Содан соң дәрігердің қарауынан өтуі қажет. Жағдайы нашар болса, науқас фильтрдегі арнайы оқшаулау бөлмесінде (изолятор) жедел жәрдемді күтіп отырады. Немесе амбулаториялық емге (үй жағдайында ем қабылдау) жіберіледі», - деді Жарас Байғожаев.

Ақтау қалалық №2 емханасында қазан айынан бері жаңа цифрлық рентген және флюро аппараты іске қосылды. Заманауи бұл аппараттар науқастарға дер кезінде медициналық көмек көрсетуге мүмкіндік береді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.