Вакцинация: Маңғыстау облысында 10 егу бөлмесі дайын

Маңғыстау облысында вакцинациялауға арналған 10 егу бөлмесі дайын. Оның екеуі - Ақтау қаласында, үшеуі - Жаңаөзенде, ал қалған Қарақия, Түрқараған, Бейнеу және Маңғыстау, Мұнайлы ауданында 1 егу бөлмесі орналасқан. Бұл туралы Қоғамдық коммуникация орталығында өткен брифингте Маңғыстау облысы денсаулық сақтау басқармасының басшысы Жамал Жаманбаева мәлімдеді.

Оның айтуынша, өңірлік денсаулық сақтау басқармасы бірқатар дайындық жүргізіп жатыр. Атап айтсақ, вакцинация маршруты жасақталды. Вакцинаны сақтайтын арнайы мұздатқыштар, термоконтейнерлер мен хладоэлементтер дайындалды. Бұдан бөлек қосымша мұздатқыштар сатып алу жоспарда бар. Емханаларда егу кабинеттері дайын. Барлық медицина қызметкері оқудан өтіп жатыр. Егуге белгіленген адамдар тізімі белгіленді.

Жалпы Денсаулық сақтау министрлігінің жоспары бойынша Қазақстанда жылдың аяғына дейін 6 миллионға жуық адам коронавирус инфекциясына қарсы вакцина алу қажет. Егілгендерге арнайы электронды паспорт толтырылады. Әзірге «Спутник V» ресей вакцинасы қолданылады. Ал әрі қарай қазақстандық «Каз Ковид» вакцинасы алынады. «Каз Ковид» 2 тексеріс фазасынан өтіп, оның адам денсаулығына қауіпсіз екендігі дәлелденді. Енді клиникалық тексерістің 3-кезеңі шамамен 2021 жылдың маусым айында аяқталады.

«Айта кетейік, вакцинация – барлық инфекциялық аурудың алдын алатын бірден-бір тәсіл. Вакцинация нәтижесінде барлық аурушаңдық пен өлім-жетім азаяды. Өйткені адам баласы дүниеге келгелі тек коронавирусқа қарсы емес басқа да вакцина ала бастайды», - деді Жамал Жаманбаева.

Оның айтуынша, қазіргі таңда эпидемиологиялық ахуал нашарлап келе жатыр. Маңғыстау облысы жасыл аймақта болса да, коронавирус індетін жұқтырғандардың саны күннен-күнге өсуде. Мәселен, инфекциялық стационарларда 112 адам коронавирустық пневмониямен ем алып жатса, 41 науқастың коронавирус инфекциясына тапсырылған тест сынамасы оң нәтиже көрсетті. 112 науқастың ішінде 20 бала бар, оның екеуінің тест қорытындысы - оң. Сондай-ақ науқастардың арасында 7 жүкті әйел бар. Оның бесеуі коронавирус инфекциясына шалдыққан. Жалпы емханаларда 135 адам симптомсыз және жеңіл симптомдармен тіркеліп, протокол бойынша ем қабылдап жүр.

«Ғалымдардың болжамы бойынша, қазір коронавирустық инфекциясының 2-толқыны басталды. Оның ең жоғарғы сатысы (пик) ақпан-наурыз айларына сәйкес келіп отыр. Сол себепті сақтық шараларын қатаң ұстанып, өзімізге де, жақындарымызға да қамқор болайық», - деді Жамал Жаманбаева.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.