Басымызға қонған бақ

Тәуелсіздік — ұлттың, жалпы адамзаттың бағы. Егемен елде, атажұрт деп аталатын ұлы далада бейбіт өмір сүріп, ұрпақ өсіріп, табиғат берген мол байлықтың арқасында өмір сүруден асқан бақыт бар ма?!

Қазақстан Тәуелсіздігін жариялағаннан бергі 29 жыл ішінде Елбасының көреген саясатының арқасында ғасырларға бергісіз істер атқарылды. Ең бастысы, Тәуелсіз Қазақстанды әлем таныды. Елбасы мен Қазақстан Республикасының Президенті Қ.Тоқаевтың тәуелсіздікті нығайту үшін саяси, рухани және экономикалық жаңғыру жолын айқындап, халықты әлеуметтік қорғау мен қолдауға басымдық беруі табысты болғанын уақыт дәлелдеп отыр. Өздеріңіз де көріп жүрсіз, бәзбіреулер «Одақтан мұра болып қалды» деп жүрген заттардың күні бүгінде елімізді жарылқап отырған бірде-біреуі жоқ десем, қателеспеймін. Барлығы жаңғырып, жаңаланып, ел игілігі еселеп артуда. Қазақстан тәуелсіздік жылдарында сынақтардан, қиындықтар мен кедергілерден сүрінбей өтіп, тұрақты даму жолына түсіп, толағай табыстарға, жаңа жетістіктерге қол жеткізді. Адами каптиталды дамыту бірінші орынға шығып, азаматтар мемлекеттік қолдауды айқын сезетін күнге жетті. Әлемді дүрліктірген пандемияға қарсы күрес кезінде азаматтардың өмірі мен денсаулығын қорғау, халықтың тұрмыс деңгейін сақтап қалу бойынша мемлекетіміздің барын салғаны бұл сөзіме дәлел болады.

Біз, ардагерлер, отбасымызда, жүрген ортамызда тәуелсіздік арқасында жүзеге асып жатқан жаңаланулар, жетістіктер туралы айта білуіміз керек. Кешегі КСРО-ны да көрдік қой. Өткен ғасырдың отызыншы жылдарының ойранын білеміз, «Коммунизмге жетеміз» деп елеске алданып, сағым қуып, сан соқтырған жылдарды көрдік. Тарих парақтарын жауып, бүгінгі күнге оралайыншы. Кейбір көрші елдердің атанжілік азаматтары мен гүлдей қыз-келіншектері күнкөрістің қамымен біздің елге келіп, жұмыс жасап, табыс тауып жүр.

Тәуелсіздік берген мүмкіндіктер туралы ойымды одан әрі өрбітіп айтар болсам,бүгінгі таңда еңбек етіп, кәсіппен айналысып, нәсібін тауып күнелтіс жасаймын деген адамның жолы ашық. Алысқа бармай-ақ ауданның тыныс-тіршілігіне назар аударайықшы. Шаруа қожалықтарын ашып, егін және мал шаруашылығын қолға алып, табыстарға қол жеткізіп жүрген адамдар аз емес. Шағын және орта бизнес саласында жеке кәсібін жолға қойғандар екі мыңның үстінде. «Үкімет бағады» дейтін түсініктен, жалқаулықтан, масылдықтан арылып, нарық заңдылықтарына бағынып, қарекет жасаған адамдардың тасы өрге домалай бастады. Тәуелсіз елде тұрмысымды арттырамын дейтін әрбір азаматқа мүмкіндік мол.

Ертеде өткен Күлтегін бабамыз «Тату елге тыныштық пен тоқшылық нәсіп» десе, әулиелер мекені Маңғыстауда өмірге келген ғұлама жа- зушы, заңғар тұлға Әбіш Кекілбаев «Тәуелсіздік – тәтті сөз ғана емес, ұлттық жауапкершілік» деп саналы азаматтың санасын нұрландыратын сөз жазған екен. Ғұламалар айтқан сөздердің мағынасын жүрекпен ұғып, басымызға қонған Тәуелсіздік бақытын бағалай білейік.

Тәуелсіз елдің тәу етер күні - ұлық мереке баршаға құтты болсын!

Сұлтан Жаңбыров,
Бейнеу аудандық ардагерлер ұйымының төрағасы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.