Облыста қар басу қаупі бар 4 автожол бар

Биыл облыстық маңызы бар 1 028 шақырым жолды күтіп, ұстауға 318 млн теңге қаржы бөлінді. Әрбір бөлінген учаскелерде қызмет көрсететін 5 мекеме бекітілді. Бұл туралы облыстық жолаушылар көлігі және автомобиль жолдары басқармасының басшысы Адайбек Қалиев мәлімдеді, - деп хабарлайды mangystaumedia.kz сайты.

Маңғыстау облыстық жолаушылар көлігі және автомобиль жолдары басқармасы басшысы Адайбек Қалиевтың айтуынша, облыстық маңыздағы автомобиль жолдарында қар басу қауіпі бар 4 учаске бар. Атап айтқанда, «Жетібай – Қарамандыбас – Жаңаөзен» (10-12 км, 14-16 км, 18-19 км, 31-33 км, 42-43 км, 46-47 км, 59-60 км, 62-64 км, 67-74 км, 74-80 км), «Қызылсай – Қарақұдық – СайӨтес» (1-4 км, 6-7 км), «Форт-Шевченко – 43 км – Ақтау – Қаламқас» (56-57 км, 69, 83, 93-95 км, 105-107 км, 126 км, 128 км), «Таушық – Шетпе» (11,5-12 км, 51 км, 54-54,7 км).

Егер облыстық маңызы бар жолдарда төтенше жағдай болса, жылыту және тамақтандыру пунктері пайдалануға берілетінін айтып отыр.

Әзірге жолдарды күтіп, ұстау жұмыстарына жауапты мекемелер күнделікті қауіпсіздікті бақылап, қар астында қалмауын қадағалап отыр.

«Қазіргі таңда Мұнайлы және Түпқараған аудандары байынша «Ақжол+К» мекемесі, Түпқараған және Маңғыстау аудандары бойынша «Ақ жол құрылыс» ЖШС қызмет көрсетеді. Ал «Мангистаудорсервис» ЖШС Маңғыстау ауданындағы маңызды жолдарға жауап берсе, «Алтынқұрық» мекемесі Қарақия ауданы жолдарын қадағалайды. Сондай-ақ «Жөндеу пайдалану кәсіпорны» Ақтау автомобиль жолдарына қызмет көрсетеді», - дейді басқарма басшысы.

Әр мекеме келісімшартқа байланысты өздеріне тиесілі жолдарды қыс мезгілінде қардың шөгінділерінен, үйінділерден қорғау, қардан тазарту, қысқы тайғақ пен мұздың пайда болуының алдын алу жұмыстары мен шараларды қолға алуы керек. Қозғалыс қауіпсіздігін ұйымдастыру және қамтамасыз ету бойынша жұмыстарын (жол жиегіндегі қоқыстарды тазалау, жол белгілерін жуу немесе ауыстыру, автожолдарды жамау) жүргізеді.

Сондай-ақ Маңғыстау облыстық жолаушылар көлігі және автомобиль жолдары басқармасының басшысы жүргізушілерге көліктің қысқы дөңгелегін ауыстыруды ескертті.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.