Өрт сөндірушілерге алғысын білдірді

Өзіміз әншейінде елей бермейтін, басымызға іс түскенде ғана асыға көмек күтетін мамандарымыздың бірі — өрт сөндірушілер. Өрт сөндірушінің міндеті –артымда отбасым, балаларым, ата-анам бар деп уайымдамастан әрдайым тәуекелге бел буып, лаулаған от арасынан өзге адамдарды және мүмкіндігінше олардың мүлкін сақтап қалуға ұмтылу. Олардың ерлікке пара-пар жұмыстары күн сайын жасалып жатыр. Әлбетте, отқа оранған үйге кіру үшін немесе өрт түгел шарпыған ғимараттың шатырына өрт сатысымен көтерілу тек қана батыл да батыр адамның қолынан келетін іс. Өйткені, ол жерден оның тірі шығуы беймәлім... Жақында Ақтау қаласындағы 11 шағын ауданның №5 үйінің 88-пәтерінде тұратын азаматша Ольга Белова атынан Маңғыстау облыстық төтенше жағдайлар департаментінің (ТЖД) өрт сөндіру және аапаттық-құтқару жұмыстары қызметінің бастығы, азаматтық қорғау подполковнигі Е.Мауленовке алғыс хат келіп түсті. Ольга Белова Ақтау қаласын қорғау бойынша 1-мамандандырылған өрт сөндіру бөлімінің өрт сөндірушілеріне, яғни, аға өрт сөндірушісі азаматтық қорғау прапорщигі Нұрқиса Эминовке, аға өрт сөндіруші азаматтық қорғау сержанты Азимбек Кулхановқа, өрт сөндіруші азаматтық қорғау кіші сержанты Ермұхан Алдекеевке және бөлім бастығының орынбасары азаматтық қорғау аға лейтенанты Бақытжан Үсеновке, сонымен қатар бөлімше, азаматтық қорғау кіші сержанты Жәнібек Құлашатовқа жедел жұмыстары үшін алғысын білдірді. 8 қараша күні бес қабатты осы үйдің төртінші қабатында пәтер өртенген болатын. Өрт сөндірушілер шақырту орнына төрт минутта жетті. Терезеден қою қара түтін шығып жатты. Өрт сөндірушілер келіп жеткенге дейін пәтерде өрт өршелене түсті. Пәтер қабырғалары ХДМ пенопластпен қапталғандықтан от жалыны ерекше жылдамдықпен бөлмеден өтіп, жалмап барады. Өрттің адамдар орналасқан көрші қабаттарға өту қаупі төніп тұрған бұл жағдайда бірден дұрыс шешім қабылдау керек еді. Өрт сөндірушілер ұзақ ойланып тұрмастан АКП-54 автокөтергішімен көрші пәтердегі тұрғындарды қауіпсіз жерге көшіріп, өртті ауыздықтады. Осылайша олар азаматтық және кәсіби борышын жауапкершілікпен орындап шыққан-ды. Бұл, әрине, күнделікті жұмыстың бірі ғана.

   Валентина ҚОЗЫБАҚОВА