Маңғыстаудың мың жылдығына арналған шараларға старт берілді
[ 2019 ] 5 маусым, 08:25 | Жаңалықтар
Маңғыстау атауының тарих бетінде пайда болғанына - мың жыл. Тарихшылар кәрі түбектің тарихы сонау энеолит заманынан бастау алғаны, ал біздің заманымыздың 1000 жылынан бастап Маңғыстау (Маңғышлақ) атауы пайда болғанын дәлелдеді. Өлкенің мың жылдығына орай биыл облыста 150-ден астам іс-шара өтпек. Соның алғашқысы кеше Ақтауда теңіз жағалауында өтті.
Теңіз жағалауында Мемлекеттік рәміздер күніне орай өткен шарада мыңнан астам өнерпаз қатысты. Концертте патриоттық әндер шырқалып, ұзындығы 17, ені 9 метрлік көк ту Каспий жағалауында желбіреді.
https://www.youtube.com/watch?v=2WVZHIo8QqU
Маңғыстау облысының әкімі Ералы Тоғжанов Мемлекеттік рәміздер күніне арналған мерекелік шараның құтықтау сөзінде Маңғыстау атауының мың жылдығына орай аймақта жүздеген іс шара ұйымдастырылатынын мәлімдеді.
Облыс басшысы Маңғыстаудың мың жылдығына арналған шараларға старт берді. Тағлымы мол «Маңғыстаудың мың жылдығы» атаулы датасын ресми түрде жариялау мемлекеттік рәміздер күнімен тұспа-тұс келуі кездейсоқтық емес.
«Біз Бірлік пен татулықтың арқасында Тәуелсіздігімізді тұғырына қондырып, Мәңгілік Ел құрдық. Мемлекеттік ту, Елтаңба, Гимн – тәуелсіздіктің символы, елдіктің нышаны болса, «Маңғыстаудың мыңжылдығы» өлкеміздің символы, түп-тамырымыз терең екендігінің айшықты дәлелі. Мемлекеттік рәміздерде ата-бабаларымыздың өткен жолы мен тарихы көрініс тапса, сол тарихты терең тану, өскелең ұрпаққа насихаттау - біздің, аға буынның асыл парызы», - деді Ералы Тоғжанов.
Айта кетелік, өңірде Маңғыстаудың тарихын жүйелеу мақсатында облыс әкімінің тапсырмасына сәйкес кешенді ғылыми зерттеулер, халықаралық деңгейде экспедициялар мен конференциялар өтті. Нәтижесінде Маңғыстау атауының тарих бетінде 1000 жыл бұрын пайда болғаны дәлелденді.
Бір жыл алты ай ішінде 7 елдің 70-ке жуық ғалым Маңғыстау мұраларын зерттеп, «Маңғыстау атауының мың жылдығы» нақтыланды.
Осы дата аясында Маңғыстау облысында «Тарих толқыны: Маңғыстаудың мың жылдығы» халықаралық ғылыми конференциясы ұйымдастырылып, Ұлы Жібек жолындағы Алтынқазған, Қарақабақ, Қызылқала, Кетікқала қалашықтарына кешенді археологиялық қазба жүргізіліп, жер асты мешіттері мен таңбалы тастарын ғылыми зерттеледі, оларды қорғауға алу қолға алынады. Сонымен қатар, тарихи - археологиялық ескеркіштерге қызығушылық танытқан дүниежүзілік National Geographic және франциялық Pernel Media компаниялар Маңғыстауда деректі фильмдер түсіреді.
[gallery td_select_gallery_slide="slide" ids="80777,80776,80774,80773,80775"]
869
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
