Еркін сұхбатта қоғам белсенділері қандай мәселелерді көтерді?

Маңғыстау облысының әкімі Ералы Тоғжанов үкіметтік емес ұйымдардың өкілдері және өлкедегі қоғам белсенділерімен кездесті. Еркін форматтағы жиында әлеуметтік сала, денсаулық, білім, бала тәрбиесі тақырыбындағы мәселелер талқыланып, өңір үшін өзекті сұрақтар көтерілді. Қоғам белсенділері тұрғындарды толғандырып жүрген өзекті мәселелерді ортаға салып, өз ұсыныстарын жеткізді. Алдымен облыс әкімі жуырда жүзеге асатын жобаларға көз жүгіртіп өтті. «Алдағы уақытта ғылыми экспедиция аясында 77 ғалым Маңғыстау өлкесінде зерттеу-талдау жұмысын жүргізеді. Кәрі Еуропа дүние бөлігінен, Кэмбридж жоғары оқу ордасынан профессор-ғалым, Германия, Түркия елдерінен археолог мамандар келіп, Маңғыстау түбегінің төл тарихына талдау жүргізеді. Сондай-ақ жаңа инвесторлармен бірлесе маңызы зор, әлеуеті жоғары кешенді жобалар іске асады", - деп атап өтті Е.Лұқпанұлы. Басқосуда ең алдымен қоғам белсендісі Жәнібек Қожық өңірдегі құрылыс үрдісіне шетелдік арзан жұмыс күшін пайдалануды қысқартып, әр ауылдан жергілікті құрылыс бригадаларын құру, оларды тендерлер конкурсына қатыстыру мәселесін көтерді. Сондай-ақ ол Маңғыстау атауына мың жыл толуына орай ұйымдастырылатын іс-шаралар аясында Оңды ауылы маңындағы кей тарихи ескеркіштерді қайта қалпына келтіру үшін күрделі жөндеу жұмыстары жүзеге асырылса деген ниетін танытты. Сондай-ақ ел азаматы Қолғанат Нұржаубайұлы облыстық онкология бөлімшесі білікті дәрігерлерге өте зәру екендігін баса айтып, белгісіз себептермен қызметтен босатылған мамандар қайта жұмысқа қабылданса деген тілегін білдірді. Өңір басшысы өз кезегінде істің мән-жайын байыппен саралап, мамандарға қатысты қызметтік тексеріс жүргізу, сондай-ақ бірнеше жылдар бойы тұралап тұрған онкология кешені құрылысын аяғына дейін жеткізу, білікті кадрларды қарқынды іске тарту бойынша шенеуніктерге бірқатар тапсырмалар жүктеді. Басқосуда қала аумағындағы киелі орын – «Алты құлаш әулие» ескерткішінің айналасын тазарту, қалпына келтіру мәселесі де көтерілді. «Бекет ата» қалалық мешіті құрылысын жоспарлы аяқтау, мешіт айналасындағы жекеменшік жер телімдеріне қатысты өзекті пікірлер ортаға салынды. Орынбасар Құлбеков Жаңаөзендегі атшабар жай-күйін оңалту, оны ел игілігіне жарату, атбегілік өнерді насихаттау арқылы ұлттық спорт құндылықтарын ұлықтау туралы мәселенің бір шетін шығарды. Өңір басшысы атшабарды ауқымды кәсіп көзіне айналдырса, оның тиімді тетігін табу арқылы толайым табысқа кенелу де мүмкін екендігін тілге тиек етті. «Ресей елінде осы ипподромды қомақты табыс көзіне айналдыру өте жақсы дамыған. Инвесторлармен бірлесе атшабардың әлеуетін толық пайдаланып, оның дамуына мүмкіндік жасауың керек», - деді облыс әкімі. Мұнайлы ауданы Атамекен мен Басқұдық ауылдарында қоныс тепкен тұрғындар үй-жайында жаңбыр суынан туындайтын қолайсыздықтар жайы да баяндалды. Облыс әкімі Мұнайлы ауданына қатысты күрделі жол жөндеу, кәріздік жүйелерді орнату, сумен жабдықтау сынды сапалы инфрақұрылымдық желілерді тарту жобасы кезең кезеңімен іске асатындығын жеткізді. Ал "Жастар жетістігі" қоғамдық қорының төрайымы Ж.Махамбетова жастар тәрбиесіне аса көңіл бөлу, букмекерлік кеңселердің «көлеңкелі» бизнесін ауыздықтау, бұзақылықтар мен жасөсіпірмдер арасындағы қылмыстық фактілерді қысқарту мен алдын алу, құқықтық сауаттылықты арттыру, жалпы қоғамдық қауіпсіздікті қамтамасыз ету турасында салмақты ойларын ортаға салды. Сондай-ақ өңірдегі ауыз су тапшылығы, "Алматы-Маңғыстау" темір жол бағытындағы вагондардың жай-жапсары туралы жайттар да сөз болды. "Алас" құқықтық қолдау орталығының төрайымы И.Проняева мүмкіндігі шектеулі жандарды арнайы жасақталған көлік, яғни инватаксимен қамтамасыз етуде туындайтын тапшылық жайын баяндады. Осы секілді облыс әкімімен кездесуде өзекті мәселелер турасында өрелі ой-пікірлер айтылып, қоғам өмірінде туындайтын түйткілді жайттар талқыланды. Өңір басшысы жауапты қызметкерлерге бірқатар міндеттер жүктеп, тез арада орын алған кем-кетіктерді түзеуді тапсырды. Айта кетелік, Маңғыстау облысының әкімі тұрғындармен жүзбе-жүз кездесіп, мәселемен жақын танысу мақсатында былтырдан бері өңірдегі 61 елді-мекенді түгел аралап шыққан. Жұмыс сапары кезінде мыңдаған тұрғынмен кездесіп, 140 хаттамалық тапсырма берген. Бүгінде оның 80-і нақты орындалса, қалғаны бақылауға қойылды. Мұндай форматтағы кездесу осымен бірнеше мәрте өткізіліп тұр. Алғаш рет 2017 жылы кездессе, былтыр қоғам белсенділері мен үкіметтік емес ұйымдары қойған 42 сұрақ облыс басшысының жіті қадағалауымен оң шешімін тапқан.

Голрох ЖЕМЕНЕЙ

[gallery td_select_gallery_slide="slide" ids="80764,80763,80767,80762,80765"]