Маңғыстаудың үздік мемлекеттік қызметшілері анықталды

Маңғыстауда «Үздік мемлекеттік қызметшілері" анықталды. Республикалық конкурстың өңірлік деңгейінде озық шыққан 7 қатысушы енді Нұр-Сұлтан қаласына аттанады, - деп хабарлайды mangystaumedia.kz сайты. Республикалық «Үздік мемлекеттік қызметші» конкурсының өңірлік кезеңіне құжат сәуір айында қабылданып, 31 үміткер конкурстың тестілеу кезеңіне жіберілген. Олардың 13-і сынақтан сүрінбей өткен. Қатысушылардың 12-сі әңгімелесу кезеңінде бақ сынады. "Әңгімелесу кезінде сауалнама көрсетілген мәліметтер, эссенің сапасы, марапаттары, ғылыми атағы мен дәрежесі, «А» корпусы қызметшілерінің кадрлық резервіне тіркелгені, спорттық және қоғамдық қызметі назарға алынды. Жеке жобалық жұмыстары бағаланды", - деп мәлімдеді МҚІжСЖІА Маңғыстау облыстық департаментінің баспасөз қызметі. Жеке жобасында мемлекеттік органдар қызметінің тиімділігін арттыруға бағытталған ұсынысы болуы тиіс. Қатысушы нақты, дәйекті және бұрын тәжірибеде болмаған ойды ұсынуы тиіс, яғни қолданыстағы тәжірбиені ұсына алмайды. Бірінен бірі өткен жобалық жұмыстарды бағалаған  комиссия мүшелері 12 үміткердің ішінен 7-еуін үздік деп таныды. Олардың арасында Маңғыстау облысы білім басқармасының мектепке дейінгі және жалпы орта білім беру бөлімінің басшысы К.Кулатаева, Мұнайлы аудандық жұмыспен қамту және әлеуметтік бағдарламалар бөлімінің сектор меңгерушісі Р.Кесикбаева, Маңғыстау облысы әкімі аппараты басшысының орынбасары Ә.Балманова, МҚІжСЖІА Маңғыстау облыстық департаментінің бас маманы Е.Жұмабай мен Ж.Шыртанова және қатысушылардың ішіндегі ең жас мемлекеттік қызметші, Маңғыстау облысының индустриялық-инновациялық даму басқармасының бас маманы Т.Сахтаганов, Ақтау қалалық кәсіпкерлер және өнеркәсіпті дамыту бөлімінің сектор меңгерушісі Нұрсейіт Айладыр бар. Олар конкурсының финалдық кезеңіне, яғни республикалық деңгейіне өтті. Айта кетелік, «Үздік мемлекеттік қызметші» байқауының өңірлік комиссия 9 адамнан және хатшыдан тұрады. Оның құрамында мемлекеттік органдардың, қоғамдық бірлестіктердің, үкіметтік емес ұйымдардың, бұқаралық ақпарат құралдарының өкілдері, тәуелсіз сарапшылар мен қоғам белсенділері бар.