"Денис Тен - Таңғажайып шоу" деректі фильмі жарыққа шығады
[ 2019 ] 13 ақпан, 10:39 | Жаңалықтар
Қазір премьераға дайындық жұмыстары жүріп жатыр. Фильм Алматы қаласындағы Bekmambetov Cinema кинотеатрында 23 ақпан мен 3 наурыз аралығында көрсетіледі. Бұл туралы спортшының инстаграмдағы ресми парақшасы жазды.
Денис Теннің соңғы 5 жыл қатарынан Астана және Алматы қалаларында "Денис және оның достары" атты мұзды шоу ұйымдастырғаны белгілі. Елімізге тың жобаны әкеліп, оны жоғары деңгейде ұымдастырып, әлемнің мұзда сырғанау шеберлерін қазақша киіндіріп, билеткен ол ел есінде мәңгі қалды. Деректі фильмде осы шоудың тарихы, дайындығы, өту барысы жан-жақты көрсетілмек. Эфирге шықпаған тың кадрлар және достары мен әріптестерінің сұқбаты да ұсынылмақ.
Фильмнің аннотациясында "Денис ұйымдастырған шоу – мұздағы күрделі элементтерді шебер орындау ғана емес. Бұл идеяның тууынан бастап оны іске асыруға дейінгі күрделі шығармашылық процес: әуен таңдау, іздеу және жасау, хореографияны қою, бейне сүйемелдеуді дайындау т.б." делінген.
Айта кетейік, көрсетілімді Денис Тен қоры мен Bekmambetov Cinema компаниясы бірлесіп ұйымдастырып жатыр. Көрсетілімнен түскен қаржы Денис Тен қорына беріледі.
1077
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
